Hapoh ka 6 bnai dawa u MLA ka BJP ban pyndep noh ia ka Smart City ha South Shillong 

Syllad | The Rising MeghalayaMay 24, 2024

U MLA ka BJP na South Shillong Constituency u Bah Sanbor Shullai ha ka 23 tarik Jymmang, u la dawa ia ka jingtuklar lem jong u Symbud Myntri Rangbah ka Jylla uba khmih ia ka Tnat Urban Affairs u Bah Sniawbhalang Dhar na ka bynta ban pyndep ia ka project Smart City ha ki bynta ka constituency ka jng u hapoh ka hynriew bnai.

Ha ka dorkhat sha u Dhar, u Bah Sanbor u la ong, “Nga kwah ban kyrpad ia ka Tnat ba dei khmih ba kan pyndep noh ia ka project Smart City hapoh South Shillong Constituency hapoh ka hynriew bnai. U la pyntip ba ka department ha ka shithi kaba ha ka 25 tarik u Iaiong 2023 ka la kdew ia kiba buntylli ki jaka ba kongsan ban pyntreikam ia ka integrated command and control centre (ICCC) kumjuh ia kiwei pat ki jingdonkam kum ki smart poles, VMD, ECB & PAS, CCTV ITMS bad RF Towers nalor kiwei pat.

Halor kane ka bynta u Bah Sanbor u la ong ba u la pynlong ruh ia kiba bun tylli ki jingialang bad ki nongialam shnong, ki kynhun bad ki tnat sorkar kiba dei khmih khnang ban pynthikna ban pyndep ia kine ki projek ba la pynkhreh ha ka bor kaba biang.

“Hynrei, ka jingpynslem ban pyndep ia kane ka project ka donkam ban pynkynmaw biang mardor bad ba ka tnat ba dei khmih ka dei ban pynthikna ban pyndep noh ia ki kam kiba sah hapoh ka hynriew bnai,” u la ong.

Da kaba pynpaw ba ia ka smart road na Rhino Point shaduh Laban Last Stop ym pat shym la sdang satia, u Bah Shullai u la ong ruh ba ka jingtyrwa halor ka jingpyndait ia ki CCTV hapoh Cantonment area ym pat shym la shimkhia da ka kynhun kaba pyntrei wat hadien ka jingiai bteng ban aiktien namar ia katei ka jaka kaba kongsan.

U la ong ba ka jinglah ban pyndep ia kane ka project kaba kongsan kan iarap shibun ia ki bor pulit na ka bynta ban tehlakam ha kaba iadei bad ka jingkynrei jong ki kam dih drok, ki kam tuh kam thiem bad halor ka shongsuk shongsain.

Ki kynhun kiba don bynta kiba kynthup naduh ki Dorbar Shnong, ki kynhun treimon sngewbha bapher bapher ki dei ban ioh jingtip ha kaba iadei bad kane ka projek namar kan iarap shibun ia ka jingtreikam jong kine ki kor ki bor bad khnang ban lah ban sumar bad ban pynneh pynsah ia ki.

Shuh shuh une u MLA ka BJP u la kdew ruh ba ki don buntylli ki jaka kiba ju mih khah khah ki jingiakajia ha ki bynta jong ka Cantonment area, kata kaba kynthup kum ha Jahlupra, Lower Paltan Bazar, Paltan Bazar bad Cantonment Beat House.

U la ong ba kine ki jaka kim dei ban shah iehnoh na ka project Smart City ka ban pynpulom noh ia ka jingthmu ban pynlong ia ka nongbah Shillong kaba phuh ba phieng lyngba ka jingpyndait ia kine ki kor ki bor.