Hapdeng ka jingiphuh iphieng kut noh ka Behdieñkhlam ka raij Chyrmang

Syllad | The Rising MeghalayaApril 26, 2023

Ka lehniam Behdeiñkhlam jong ka Raij Chyrmang ba kynthup ïaka shnong Iongnoh bad ka Chyrmang kala poi noh sha kaba kut haka sngi Balang hapdeng ka jingiphuh iphieng.

U Ma Lahkmen Rymbui MLA jong ka thain ula wan sakhi ia kane ka Behdienkhlam kaba la pynlong nyngkong eh da ka Raij Chyrmang. La iadonlang u Dolloi ka Elaka Jowai u Ma Puramon Kynjing nalor kiwei kiwei nongialam bad dkhot jong ki Seinraij bapher bapher.

Ia kane ka lehniam Behdieñkhlam ka Raij Chyrmang la sdang naduh ka 24 tarik une u bnai hapoh ka jingialam u Langdoh Kongwasan Chyrmang.

Ka jingleh niam Behdieñkhlam jong ka Raid Chyrmang kadei kaba khampher na kiwei pat ki Behdieñkhlam namar kadei kaba la pyndep shuwa ban leit bet ia u symbai, katba kiwei pat ki raij ka dei ban lum ban lang ia u symbai.

Kane ka jinglehniam kala sdang da ka jingknia Ryngkaw, ka Chad Iung, ka Than Blai, Thoh Langdoh, ka Hat Khrong, Ka Kamcharoh Blai, ka Chooh thyndai bad kiwei kiwei. La pyndep ia kine ki jinglehniam ha ryngkat ka suit ka shor bad ainguh iaki blei ban ai iaka rep ka riang kaba bha bad ban roi ban par u khun ka raij Chyrmang.

Ha kane ka kynti ki don 8 tylli ki rot kiba la wanpoi ha aitnar ryngkat ka jingsawa ka bom bad ka jingud ka tang tangmuri.