Hadien 24 snem plie iaka Meghalaya Biological Park ha Umtrew Ri Bhoi

Syllad | The Rising MeghalayaNovember 28, 2024

U Myntri Rangbah ka Jylla Conrad K Sangma haka 27 tarik Naiwieng ula plie paidbah iaka bynta kaba nyngkong ne phase I, jong ka Meghalaya Biological Park ha Untrew, Ri Bhoi District.

Kane ka jingplie ia kane ka park kala wan urlong hadien 24 snem naduh ba sdang ban shna ia ka namar ki jingeh kiba har rukom.

La iadonlang ha kane ka jingplie paidbah ia kane ka park naduh u myntri Animal Husbandry & Veterinary, A L Hek, MLA, Celestine Lyngdoh, Chief Advisor, Lakhmen Rymbui bad u Chief Secretary, D P Wahlang.

Haba kren haka jingialang plie, u Myntri Rangbah ka Jylla, Conrad K Sangma u la ong, ka jingplie ia kane ka park ka pynkmen bad pynsngewhun ia u ban plie iaka 1st Phase jong ka Meghalaya Biological Park kaba la shim por jan 24 snem ban pyndep naduh ba la sdang ïa ka namar ki jingeh bapher bapher bad watla ngi la lah ban plie iaka bynta kaba nyngkong ka dang donkam shibun ban leh ba kan bit biang bad treikam pura.

U la bynrap ruh ba ka jingpyndep ïa kane ka project kaba la sahteng la slem bha ka pynshisha iaka jingkut jingmut ka sorkar ban rah iaka jylla shakhmat.

U la pyntip ruh ba watla bun ki bynta jong ka Biological Park, kum ki jaka die tiket, ki jaka bam, ki dukan die jingkynmaw bad ki jaka kynroh ki dang donkam ban pyndep hynrei ka long kaba kongsan ban sdang ïa ka bad bynrap, “Kane ka Biological Park ka lah ban long ka jaka ym tang na ka bynta ka jinglehkai bad pynbyrngia, hynrei ka rynsan ban iakynduh khamtam bad ki samla bad ban pynsngewthuh ia ki samla bad ki khynnah ban sngewthuh bad don iaka jingkitkhlieh ha kaba iadei bad ka mariang bad ki mrad khlaw.”

 “Ka dei ka jingthmu ba kongsan jong ka sorkar ban buh ia ka jingpyniaid beit ia ka mariang bad ki projek kum kine ki ailad ia ngi ban ai jaka ia ki mrad kiba la pyllait im ne ki bym lah ban leit phai biang sha la ka jong ka jaka shong jaka sah,” la ong u Myntri Rangbah ka Jylla bad kyntu ia ka jingdonkam jong ka jingbuh jingmut ha ki nongïoh jingmyntoi ba kongsan jong kum kine ki jingthmu. U la ong ruh ba ka dei ka jingthmu jong ka sorkar ban pynim biang ia ki projek kiba rim kiba la sahkut.

U Myntri Rangbah ka Jylla u la kren ruh halor ka jingdonkam ban lum jingtip, ban jurip bad ban wad bniah khnang ban don ka jingkhein kaba thikna ia baroh ar ki jingthung jingtep bad ki mrad ki mreng man ka por. U la kdew ba kane ka jingtip bad jingtip ka lah ban iarap ha ki lad pynbeit ban tehlakam ia ka jingialeh hapdeng u briew bad u mrad.

“Ka jingleh iaka sorbe bad ka jinglum jingtip da kaba pyndonkam ia ka teknoloji halor ki jingthung jingtep jong ka jylla kan iarap ban pynneh pynsah bad iada ia ka mariang bad ki mrad ki mreng ha ka rukom kaba paka,” u la ong. U la ong ruh ba ki jingjia thombor ki mrad iaki briew ne ka human animal conflict kan duna tang ynda ngi la nang ban burom ïa u pud u sam jong uwei pa uwei da kaba pynpaw ba bunsien ki jingïakynad hapdeng ki briew bad ki mrad ki jia namar ka jingwan rung ki briew ha ki jaka shong jaka sah jong ki mrad.

Ha kaba pynkut, u myntri rangbah u la ong ba ka sorkar ka dang trei ia ki lad ki lynti ban pynshlur ia ki nongshong shnong ha ka liang ka pisa ha kine ki jaka kiba kongsan namar kane ka kylla long ruh ka lad jngohkai pyrthei ia kiba ieid iaka mariang bad ka wanrah iaka jingjop ha baroh arliang mamla. Ha kane ka sngi plie paidbah la don lang ruh u ma S. M. Sahai IFS Principal Chief Conservator of Forests (Wildlife & Biodiversity) & Chief Wildlife Warden, R. S. Gill, IFS Principal Chief Conservator of Forests & HOFF, Sampath Kumar, IAS Principal Secretary, Forests & Environment Department bad u P. K. Agrahari, IFS Chief Executive Officer, Meghalaya Zoo Project Implementation Society.