Ha u Jylliew yn shim rai khatduh ka Sorkar ban pynkynriah ia ki longiing na Them Metor

Syllad | The Rising MeghalayaMay 7, 2024

Ka Sorkar Jylla ka la rai ban pynlong biang sa kawei ka jingialang bad ka Harijan Panchayat Committee (HPC) ha ka 7 tarik u Jylliew u ban wan na ka bynta ban shim ia ka rai kaba khatduh ha kaba iadei bad ka jingpynkynriah ia ki 342 tylli ki longiing na Them Metor, Them Iew Mawlong.

Haba kren sha ki lad pathai khubor hadien ka jingialang bad ki nongmihkhmat ka HPC kaba la long ha Secretariat, u Symbud Myntri Rangbah ka Jylla uba khmih ia ka Tnat kam pohiing u Bah Prestone Tynsong u la ong, “Mynta ka sngi ngi la pynlong ia katto katne ki jingiamir jingmut kiba kongsan ha kaba iadei bad ka mat ka pynkynriah ia kine ki longiing Harijan. Kumba phi sngewthuh, shisien ba ngi la shim ia ka rai ban pynkynriah kata ka mut ka ban long shirta..kumta ngi la iakren halor ki katto katne ki mat bad na ka liang jong ki (HPC) ruh ki la pynpaw ia ka jingsngew mynjur.

Hynrei, watla katta u la pyntip ba ka HPC ka la kyrpad ia ka sorkar ba kan ailad ia ki ba kin iamir jingmut halor ka jingmih na kane ka jingialang bad ki briew ki jong ki hashwa ba kin wan biang sha ka jingialang kaba khatduh halor kane ka bynta.

“Na ka liang jong ki (HPC) ki la kyrpad ia ngi ban ai por sa shisien ia ki ba kin leit ban iakren sani bad ki longiing bad ha ka 7 tarik u Jylliew u ban wan, ngin sa iakynduh biang bad shim ia ka rai kaba khatduh,” ong u Bah Prestone.

Nalor kata u Symbud Myntri Rangbah u pyntip ruh ba u Director ka Tnat Urban Affairs bad u Chief Executive Officer (CEO) ka Shillong Municipal Board (SMB) ki la don hapdeng ka kam ban bishar bniah bad pynthikna ia ka jubab RTI jong ka SMB ba la ai sha ka seng HYC ba ki don tang 194 ngut ki nongtrei sorkar na ki 342 tylli ki longiing kiba shong ba sah ha Them Iew Mawlong.

Kane ka la wan long hadien ka jingdawa jong ka seng HYC ban kyndang noh ia ki 148 tylli ki longiing kiba shong ba sah beain ha Iew Mawlong da kaba pynshong nongrim na ka jinglap lyngba ka RTI.

Katkum ka jingpynpaw ka jong u, na ka liang ka sorkar ka dang ap ia ka Tnat Urbasn Affairs bad ka SMB ba kin pyndep ha ka ban bishar bniah halor kane ka bynta.

U Bah Prestone u pyntip ruh ba ka la don ka jingpluh ding kaba shyrkhei ha Them Iew Mawlong ha u snem 1996 ha kaba bun ki iing ki sem ki la shah bamduh ha ka ding bad kaba la wanrah ruh ka jingjah rngai ia ki katto katne ki kot ki sla.

“Kumta ruh kaei kaba la jia ka long ba u Director ka Tnat Urban Affairs ha u snem 2008 bad 2009 u la bthah ia ka MUDA ba kan pynlong biang ia ka jingleit sorbe thymmai ha ryngkat ka jingiadon lang kito ki longiing ha Them Metor, kata ia kaba ki la pyndep. Kumba Nga ong ha phi haba pynshong nongrim ia ka RTI ba la jubab da u CEO ka SMB, Ngam pat lah ban ong ei ei ia mynta hi namar ka MUDA bad u Director ka Urban Affairs ki dang bishar bniah ia kane ka RTI.

“Ngi la kren shai naduh ka sngi kaba nyngkong ba ngin ym ailad satia ia ki briew kiba shong beain ba kin shah kynthup ha kane ka jingpynkynriah ia ki briew kiba dei hok. Dei na kata ka daw Nga la kyntu ia ki Tnat ba dei khmih ba kin pynshisha lyngba ka jubab RTI. Lada ki don kiba shong beain bad ki bym noh synniang sha ka Jylla, ngin ym lah satia ban pdiang ia ki,” u la ong.

“Kumta ha kaba iadei bad ka jingdon jong kine ki longiing Ngam lah ban ong ei ei ia mynta hi.Ailad ban pyndep ia ka  jingpynthikna bad hadien ba la dep, Ngan sa lah ban pynthikna halor ka jingdon jong kine ki longiing,” ong shuh shuh u Myntri.