Ha u bnai Risaw yn bteng ka Assam, Meghalaya ia ka jingiakren kam khappud: CM

Syllad | The Rising MeghalayaSeptember 20, 2023

U Myntri Rangbah ka jylla u Conrad K Sangma haka Balang u la pyntip ba ka jingiakren halor ka kam kahppud bad ka Assam, kata ban weng noh ia ki jingeh na ki hynriew tylli ki jaka kiba mih ka jingiapher jingmut kan sdang ha ka taiew ba nyngkong eh taiew ba ar jong u bnai Risaw u ban wan.

Haba jubab ia ka zero hour notice ba la wanrah da u MLA ka VPP na Nongkrem u Bah Ardent Miller Basaiawmoit, u Sangma u la ong ba u CM ka Assam u Himanta Biswa Sarma dang shen u la wan sha Shillong na ka bynta ka jingialang ha kaba ka la don ka jingiakren bad u halor ki mat kiba iadei bad ki kam khappud.

“Ha katei ka jingialang ngi la shim ia ka rai ban pynlong biang ia ka jingiakren ha ka jingialang ka ban long ha ka taiew kaba nyngkong ne ka taiew ba ar jong u bnai Risaw u ban wan.” la ong u Sangma bad bynrap ba hadien ka jingialang ki myntri rangbah jong ki ar jylla kin pynlong ka jingleit jurip sha Khanduli bad kiwei pat ki jaka kum ka dak ban phah ia ka khubor jong ka jingsuk.

U la ong ruh ba ka jingialang kaba la long dang shen ha ka nongbah Shillong ka la long kaba seisoh bad baroh ki ar jylla kila khmih shakhmat ban pyntreikam ia ki jingshim rai ba kongsan ha ka jingialang ka ban long ha u bnai Risaw u ban wan.     

Kham hashwa na ka liang u MLA ka Nongkrem u la pynrem jur ia ka jingkren jong u nongialam ka Karbi Students Association (KSA) uba la ong ba ka lah ban jia kum hapoh Manipur lada kin duh noh ia ki jaka puta. U Bah Ardent u la ong ba kane ka jingkren jong une u nongialam ka KSA ka la biang ban pyni halor ka jingthmu ban pynthut ia ka shongsuk shongshngain ha ki thain khappud. U la ong ba u kwah ban tip ruh la ka sorkar jylla ka la rah ne em ia kane ka kam bad ka Assam khnang ban lah ban pynneh pynsah ia ka suk ka sain ha ki thain khappud.

Halor kane u CM ka jylla u la ong katba ki jingialang jong ki regional committee ki dang iaid shakhmat ha ka 16 tarik u Nailar ba la dep, ki nongialam ka KSA ki la wan ha ka jaka pynlong jingialang bad iakynduh ia ki dkhot ki committee hadien ba la kut ka jingialang hadien ba u president jong ka ula wan mih hakhmat ki lad pathai khubor bad pynmih ia kitei ki jingkren. Hynrei, u la ong ba ia kane ka jingkren jong u ym shym la pdiang da u Myntri ka Assam u Piyush Hazarika uba la pynpaw ba ym dei satia ban pynmih ia kum kine ki jingkren kiba lah ban nang pynjur ia ka jingiakynad.

U Conrad ula ong ruh ba ha ka 30 tarik u Nailar ba la dep, ka seng na rilum Jaintia bad ka KSA ki la pynlong ia ka jingialang ha Diphu, East Karbi Anglong District, Assam ha kaba ki la iamir jingmut halor ki sienjam ban pynneh ia ka jingsuk ha ki bynta khappud ka Assam bad Meghalaya.

Ha kane ka jingialang la thaw ruh ia ka  Students Committee for Peace Initiative bad kane ka committee kan khmih kumno ban wanrah pat ia ka jingsuk ha kine ki jaka khappud bad ban tem ia ka jingiakynad na ka jingsngew iapher jaidbynriew.

Nalor kata ki la rai ruh ba ki nongmihkhmat na kine ki ar kynhun kin pynlong ka jingleit jurip ia ki shnong khappud ha ryngkat ki nongialam shnong, bad ki la rai ruh ba ia kum kane ka jingialang kin sa pynlong ha Jowai ha kine ki sngi ki ban wan.

Da kaba pynpaw ba ia ka jinglong jingman ha katei ka thain khappud la bishar bniah bha, na ka liang u CM u pynthikna halor baroh ki sienjam ba ki la shim ban tehlakam ia ka jinglong jingman, kata da kaba ong ruh ba ki bor pulit ki la long kiba peitngor bad pynlong ka jingiaid pahara ha kitei ki jaka.

Shuh shuh ula pyntip ruh ba ka jingbuh ia ki bor pahara ka la long kaba biang hapoh ka Khanduli, Lapngap, Saitsama Outpost bad Nartiang police station khnang ban lah ban tehlakam ia ka jinglong jingman ha kine ki jaka.