Ha ryngkat ka riam tynrai, mih ki khun ka Raid Nonglyngdoh ban pyndep ia ka Shad Sajer

Syllad | The Rising MeghalayaApril 6, 2024

Ka Raid Nonglyngdoh kaba kynthup ïa ki 6 kur, kata ka Kur lyngdoh kum u Lyngdoh Raid, ka Kur Maring (Khon jing) kum u Syiem Sad, ka kur Lapang kum Kongsan Lapang, ka Kur Nongkyum Kum ki Doloi, ka Kur Makri kum ki Mazi bad ka kur Nongshli kum ki pator ha ka 6 tarik mynta u bnai ka la pynlong biang ïa ka Shad Sajer ba shisien shi snem jong ka kaba la pynlong ha u Law kyntang jong ka Raid Nonglyngdoh kaba don marjan bad ka shnong Mawjong.

Ha kane ka sngi nalor ki Longsan ki mansan jong ka raid la wan ban sakhi lang ruh da u ADC ka Ribhoi u Bah Raja Brahma kum u kongsan, ha ka jingiadon lang u Bah B.B Makdoh, Chairman ka Synjuk Ki Rangbah Shnong Ribhoi, u bah Sensi Lyngdoh, u Lyngdoh ka Raid Nonglyngdoh, U bah Rayonald Kharkamni, Samla Pyndaplang Wahlang, u bah Linus Lyngdoh, Lyngdoh ka Raid Nongpoh, lem bad kiwei kiwei ki riew rangbah.     

Ban pynneh pynsah ïa kane ka Shad Sajer kaba dei ka Riti Dustur kaba la btin lynti da u mynbarim, ka Raid Nonglyngdoh ka dang bteng ïa kane ka dustur haduh kine ki sngi kiba mynta da kaba pynlong ia ka Shad Sajer ha kaba ha kane ka sngi ki khun ki hajar jong ka Raid ki ioh ban ïashim bynta ha ka Shad ka rwai bad ka tem ka put tynrai.

Ka Shad Sajer ka dei kawei na ka lehniam leh rukom jong ka ri ka raid Nonglyngdoh kaba ju leh man lah u snem ha shwa ban sdang ka thung ka tep ban nguh ban dem na u blei ba un theh ki jingkyrkhu ïa ki khun ki hajar jong ka raid.

Ha ki por hyndai ïa kane ka lehniam Shad Sajer la ju pynlong lai sngi lynter bad ha kine ki lai sngi kin ioh ban pyndep ia ka lehniam leh rukom ban ainguh ban aidem ïa u Blei. Bad ha ka miet kaba nyngkong kaba khot ka miet thih dur ki khun Samla ki ioh ban ïa luh samla bad ha kane ka miet kim ju shah ïa ki ba la heh la san ba kin leit tuklar bad ïa kino kino kiba ioh lok na katei ka miet lane haka Shad Sajer ki ju khieñ ba ki long kiba donbok.

Nalor kata ha ka sngi kaba lai ki ioh ban pynlong pat ia ka Shad ka tem ha kaba ki khun ki hajar ki mih ha ryngkat ka riam tynrai ban pyndep ia ka lehniam leh rukom.