Iaid shait shait ka jingpynkhreh buh Entry Exit Point ha West Jaiñtia Hills, ap sa ka kaiphod na Tourism

Syllad | The Rising MeghalayaJune 19, 2019

JOWAI: Ka Khasi Students Union Jaintia Hills District Unit hynne ka sngi ka la leit ia kynduh ia u DC ka West Jaintia Hills District u Ma LSN Dykes Garod hapoh ka jingialam jong u General Secretary Garland S Manner bad u Shaniahskhem Dkhar Asst Finance Secretary bad kiwei kiwei ki nongialam bad dkhot ka KSU Jaintia Hills District Unit..

Kane ka jingleit kynduh ka KSU ïa U DC kadei halor ka Nongrim ban pynkynmaw biang ia u DC halor ka Entry bad Exit Point kaba don ha shnong Saphai bad Khanduli West Jaintia Hills bad ruh han pan jingpynshai halor ka jingiaid shaphrang ka kam kaba iadei bad ka Entry and Exit Point hapoh West Jaintia Hills

Haba pan jingpynshai na u Khliehduh jong ka District, u la ong ba naka liang jong u, u la dep pynbeit ban ia shong meeting bad ka District Task Force bad kiwei ki Department ki ba dei peit ia kane ka kam haka 3/07/2019 naka bynta ban iakren ia katei ka phang.

U DC ula ong ruh ba u dang shu wan shimti iaka kam ha kine ki shi sngi ar sngi kumta um pat lah ban ong eiei halor ki kam ba iadei bad katei ka jingbuh khyrdop, hynrei hadien ka 3 tarik kan kham shai haduh katno bala iaid ka kam halor kane ka jingthmu..

Ha kaba iadei bad ka jingthmu tei iaka Entry and Exit points ha Khanduli, naka liang u DC ula ong ba ka kam ka ladep nadong shadong khamtam iaka jingshim jaka, hynrei kaba sah dei sa tang ka report na ka Tourism Department.

Katba ka Saphai pat ula ong ba iaka Jingpynsngew Paidbah (Public Hearing ) la dep pynlong ha katei ka shnong bad naka liang ki Nongshong shnong ruh ki la pdiang bad mynjur ban tei iaka Entry and Exit Point, hynrei ka ba dan sah ka long satang ka jingia pynbeit bad ki trai jaka.

Naka liang u Shaniah Dkhar ula ong ba ” Ngi banjur iaka Sorkar ba ka dei ban pynsted iaka kam ha kaba iadei bad ka jingtei iaka Entry and Exit Point khnang ba ka jingthmu tehlakam iaka jingwantuid ki mynder yn lah ban sdang noh mar mar”.

“Ka sorkar kam dei ban pyllut kai iaka por, namar kat dang slem, katta dang jur ka jingwan tuid ki mynder sha poh ka jylla ka jong ngi” la ong u Shaniah Dkhar.

“Man ka sngi ki wan tuid shapoh ka Ri Khasi daki spah spah ngut na kylleng ki jaka bad ki lad, kumta ka donkam kloi ban pynsted iaka jingtei iaka khyrdop ban khynra mynder ” ula bynrap shuh shuh.

Ka Seng ka la rai ruh ban buddien biang halor kane ka kam tei khyrdop hadien ba ladep ka jingialang kaba la thmu ban pynlong haka 3/7/2019 iakaba la pynbeit hapdeng u DC bad ki tnad Sorkar baroh kiba don hapoh West Jaiñtia Hills.

“Ngi khmih lynti ba ka sorkar ban ialeh ban pynsted ia kane ka kam bad ngi kyrpad ruh ia u DC ban shimkhia ban sdang noh ka jingshna iaki khyrdop ha ka shnong Khanduli bad Saphai,” la ong u Shaniah Dkhar.