Durand Cup 2023: Plie paidbah u Myntri Rangbah ia ki khusnam, ka Meghalaya kan ioh pynlong ha u snem ban wan

Syllad | The Rising MeghalayaJuly 21, 2023

Ka tnat Sports and Youth Affairs, ka sorkar Meghalaya ha ryngkat ka jingiatreilang bad ka Eastern Command jong ka Indian Armed Forces haka sngi Thohdieng kila plie ia ki laitylli ki khusnam ne trophy kiba la ap khmih lynti, kata ka  ‘Durand Cup  Trophy’ bad ka ‘Shimla Trophy’ (baroh kiba dei ki rolling trophy) bad ka President’s Cup (kaba ioh ban rah ei junom) ia kiba la pyniaid bad pyni paidbah ha Khyndailad, Shillong.

Ia ka jingialang kaba heh la pynlong hapoh State Convention Centre, Shillong ha ka jingiadon ryngkat lang u Myntri Rangbah ka Jylla Conrad K Sangma, Bah DP Wahlang, IAS, Chief Secretary ka Jylla, u Lieutenant General Sanjay Malik, Air Marshal Tejinder Singh lem bad kiwei pat ki heh sorkar na ka tnat sorkar bad shipai.

Haba rakhe ia ka wat kaba 132 sien jong ka mynta u snem, ka Durand Cup ka la ioh ia ka nam kum ka jingialehkai football kaba la rim tam ha ka dewbah Asia bad kaba lai ha ka pyrthei.

Kane  ka tournament la pynkhreh ban pynlong naduh ka 3 tarik u Nailar haduh ka 3 tarik u Nailur 2023, ha kaba yn sakhi ia ki 24 tylli ki team na ki thain bapher bapher jong ka ri, kata kynthup ia baroh ki 12 tylli ki team jong ka Indian Super League ha ryngkat ki team kiba na shabar jong ka ri bad ki ri ba marjan kum ka Bangladesh bad ka Nepal ki ban wanphai biang sha kane ka lympung ialehkai hadien 27 snem kynthih. Nalor kata la pynbna ruh ba ka Shillong kan dei kawei na ki jaka sor ka ban khot pynlong ia kane ka tournament ha u 2024.

Haba kren ha ka jingialang u CM ka jylla u Conrad K Sangma u la ong; “Ka long ka burom kaba khraw ban ioh ia ka lad ban iadon ryngkat lang ha kane ka sngi na ka bynta ban plie ia kine ki trophy na ka bynta ka Durand Cup 2023, bad ai ruh ka jingkhublei kyrpang ia u General Sanjay Malik halor ka jingpynlong ia kane ka prokram.

Nalor kata u la ong ruh ba ka Meghalaya barabor ka la long ka rynsan na ka bynta ban pynpaw ia ki sap ki phong ha ki kam ialehkai sport, bad ka jingioh rung ba dang shen sha ka final ha ka Santosh Trophy ka pynpaw halor ka jinglah jong ki nongialehkai sports ki jong ngi.Ngi kyrmen skhem na ka bynta ban ai ia ka jingkyrshan bad ia ka kabu na ka bynta ban kyntiew ia kine ki sap ki phong, bad ha kine ki san snem kiba la dep ngi la pynlut shibun na ka bynta ban kyntiew ia ki kam ialehkai sport kaba dei ruh ka thong kaba hakhmat eh na ka bynta ka jylla ka jong ngi.

Ha kajuh ka por u CM u la pynpaw ka jingkmen kaba khraw ban pynbna ba ka Meghalaya kan ioh ban khot pynlong ia ka Durand Cup 2024 tournament. U la ong ba ka sorkar jylla kadon ia ka jingkut jingmut ban kyntiew ia ki nongialehkai sport ka jylla. U sngew skhem ruh halor ka jinglong lakloi ban khot pynlong ia ki jait jingialehkai sport ba bunjait ha ka jylla.

Shibynta jong kane ka thong, u la ong ba na ka liang sorkar ka la tei ruh ia ki jaka ialehkai ha ki bynta bapher bapher ka jylla kaba la plielad ia ki nongialehkai sport ba kin lah ban kiew shaphrang.Kumjuh u kyrmen ruh ia kaba bha tam na ka bynta baroh ki nongiashim bynta ha kane ka tournament.

Ka Shillong Lajong FC, ka la shah kynthup ha ka Group D ha ryngkat ki kynhun ki ban ialeh pyrshah, kata ka Northeast United FC, FC Goa, bad ka Downtown Heroes FC of Kashmir ha kane ka tournament jong ka Durand Cup.Ka  Shillong Lajong FC kan iakhun ha ka sngi plie pyrshah ia ka Northeast United FC ha ka 4 tarik u Nailar ha Indira Gandhi Athletic Stadium ha Guwahati.