Donkam kyrkieh ban wanrah jingkylla ha ka jingtreikam ki BSF ka jylla: KSU

Syllad | The Rising MeghalayaFebruary 13, 2024

Ka Khasi Students’ Union (KSU) War Jaintia Circle haka sngi Nyngkong, ka la ong ba ka jingjia shah thombor ba dang shen jong u ophisar sorkar ha ki shipai Border Security Force (BSF) ka pynpaw halor ka jingdonkam kyrkieh ban wanrah jingkylla bad ka jingkhuid ha ki jingtreikam jong kane ka tnat shipai khnang ban pynthikna ba kum kine ki jingpyndonkam bakla ia ka bor kin ym wan jia shuh nangne shakhmat.

Ha ka shithi sha u SDO (Civil), Amlarem, u president ka KSU-WJC u Lop S Khonglah u la ong “Kane ka jingjia kaba sngewkhia jur kam dei satia kaba dang thymmai. Ki BSF ka 4th battalion ki ju leh ruh ia ki kam leh donbor pyrshah ia ki nongleit iew leit hat kumjuh ia ki paid nongrep. Ki ju khang lynti ruh khah khah ia ki kali kaba pynlong ia ki nongniah kali bad ia ki nongkhaii ba kin hap ban mad ia ka jingduh nong kaba khraw namar ka jingkhynra jong ki BSF. Hadien ba kila khynra bad pynhap lut ia ki mar ki Mata ki ju iehnoh khlem da iarap lem ban kyntiew bad thep biang ia ki bad kaba la wanrah jingeh ia ki nongkhaii ban pynbeit biang ia ki mar kaba shim por da ki bun bun kynta bad wanrah ka jingduh nong kaba jur.”

Da kaba daw pynshitom pyrshah ia kito ki BSF kiba donkti ha kaba thombor ia utei u heh sorkar ka jylla, u Bah Khonglah u la ong ba kum ka Seng hi kam lah satia ban shah jem ia kiba kum kine ki kam thombor ba ki kam pyntieng pynsmiej ia ki nongshong shnong lyngba ki bor kiba dei ban ai jingiada ia ki. “Kumta ngi kyntu jur ban shim ka jingpynshitom ha kaba iadei bad kane ka jingjia khnang ba kito kiba donkti kin ym lait suk bad ruh ban shim ia ki sienjam ban khanglad ia kiba kum kine ki jingjia nangne shakhmat khnang ban ioh pat ia ka jingshaniah lyngba ki bor shipai iada khappud,” la ong u Lop

Lah ban kdew ba ha ka 11 tarik mynta u bnai, ka kynhun ki shipai BSF la kynnoh ba kila thombor bad byrthen ban siat iap ia u ophisar jong ka Tnat AH & Veterinary ka Muktapur, u Dr Seiboklang Buam da kaba maham patan ia u sha ki bynta jong u zero-line halor ki jingpharep kam khaii tuh, kata ha ka jingjia ha ka por ba u Buam u dang khwai dohkha.

Hynrei, donbok namar ka jingwan tuklar lem jong ki para nongkhwai kynthup ia ki longkmie la lah ban khanglad ia kane ka jingthmu ba sniew jong ki BSF kiba la thombor bad phah law lynkhuid ia u da kaba phah ruh ba un pan map bad ktah ia ki kjat jong ki, ong ka KSU ha ka shithi.

“Kaba kum kane ka jingleh tohmet ba pynlehrain kam dei ban ioh satia ha ka imlang sahlang kaba la shai bad kaba ka ain ka synshar. U lanot uba la ngat ha kane ka kam riewkhlaw la ithuh kum u nongtrei sorkar hapoh ka Tnat Veterinary, bad kane ka jingshah thombor jong kiba kum kine ki briew kiba ha ka kyrdan ophisar ka pynpaw ka jingsngewkhia halor ka jingshngain jong baroh ki nongshong shnong, kata khamtam kito kiba shong ba sah ha ki thain khappud kiba dang sahdien bad kiba duk ba kyrduh,” ong shuh shuh ka KSU.