Dawa u Bah Shangpliang na ka VPP ban pynbeit ia la ki nongkyrshan namar ki jingkynthoh lyngba ki social media

Syllad | The Rising MeghalayaApril 14, 2024

U nongaiktien ka National People’s Party (NPP) u Bah Himalaya M Shangpliang ha ka 13 tarik Iaiong, u la dawa ia ka liang pyrshah Voice of the People Party (VPP) ba kan pynbeit ia la ki jong ki nongkyrshan namar ki jingkynthoh kiba ktah lyngba ki rynsan social media.

Haba kren ha ka jingialang ialap ilekshon ha Mawkyrwat, South West Khasi Hills District, u Bah Shangpliang u la ong ba kiba bun na ki nongialam ka VPP ki dei ki Professor hapoh North Eastern Hill University (NEHU) bad ha ki kolej bapher bapher. Hynrei wat hapdeng kata, kim don satia ia ka discipline hapoh kane ka party.

U la ong ruh, U president ka VPP u la kynnoh ba ki nongialam niam ki la sam kyiad ha ka por ilekshon bad dang hynnin ka sngi ki nongkyrshan ka VPP ki la pyndonkam da ki ktien khlemamor haba kynthoh lyngba ki social media pyrshah ia u nongialam niam ka Balang Katholik.

“Lada phi hikai ia ki nongkyrshan jong phi ba kin pyndonkam da ki ktien kiba khlemakor, Nga tharai phi la ialam bakla ia ki. Lada phim shym la leh ia kata kumta ruh Nga dawa ba ki nongialam ka VPP ki dei ban pynbeit ia la ki jong ki dkhot bad nongkyrshan lada ka party ka kwah ban shakri ia u paidbah,” bynrap u heh ka NPP.

Haba kdew halor ka jingjia ba dang shen ha Umsning, U la ong, “Nga kwah ban kylli ia ki nongialam ka VPP la ki burom ne em ia ki kynthei. Lada phi burom kumno ki nongkyrshan jong phi ki pynmih da ki ktien khlemakor pyrshah ia ka kyrtong jong ngi ka Kong Ampareen Lyngdoh ha ka jingialang ha Umsning. Hato kane kadei kata ka jinglong nongialam jong phi?”

Nalor kata une u nongaiktien ka NPP u la kynthoh ruh ia ka VPP halor ka jingkular ban kynthup ia ka Meghalaya hapoh ka Article 371 na ka bynta ban pynduh pyndam noh ia ki Autonomous District Council (ADC) kiba ai ka jingiada bad jingithuh, ia ki hok bad na ka bynta ka bha ka miat jong ki jaidbynriew riewlum ka jylla bad ia ki jaka puta ki jong ki.

“Ka NPP ha kawei pat ka liang ka ieng ban pynkhlain shuh shuh ia baroh ki laitylli ki ADC. Dei ka sorkar NPP kaba la pynioh shibun ki lad jingiarap pisa sha ki ADC ban pynthikna na ka bynta ka jingiaid beit iaid ryntih ha ki jingtreikam ki jong ki,” ong u Bah Shangpliang da kaba pynthikna ruh ba lada ki paidbah kin aijingkyrshan ia ka kyrtong ka NPP ka Kong Ampareen Lyngdoh ha kane ka ilekshon Lok Sabha ka ban wan, kumta ruh kan lah ban buddien bad pynthikna ha kaba iadei bad ka jingiakhun ban kynthup ia ka ktien Khasi hapoh ka Khyrnit ba phra jong ka Riti synshar jong ka Ri India.

Haba pynpaw halor ka jingkynthoh ba ka NPP bad ka BJP ki dei ki juh, u bah Shangpliang u la ong, “Ka BJP bad ka NPP ki dei artylli ki party sain pyrthei kiba iapher bad kiba don la ki jong ki nongrim treikam. Baroh ki party ki dei ki paralok hapoh ka NDA. Ha Meghalaya ka don ruh ka UDP bad ka HSPDP. Kam don kano kano ka jingbakla ha ka jingiatreilang.”

Ha kawei pat ka bynta une u nongialam ka NPP u kyntu ruh ia ki nongkyrshan jong ka Congress ba kin ai ka jingkyrshan ia ka NPP ha kane ka Lok Sabha ilekshon ka ban wan.