Dawa pynshitom u MDC ka BJP ia ki runar ba beijot ia sawngut ki khynnah kynthei ha Garo Hills

Syllad | The Rising MeghalayaApril 23, 2024

U Vice President ka BJP, uba dei ruh u MDC ka Tura u Bernard N Marak haka 22 tarik Iaiong, u la dawa ia ka jingtuklar jong u Myntri Rangbah ka jylla u Conrad K Sangma ha kaba iadei bad ka jingjia shah rahbor, ka jingshah thombor bad shah leh beijot jong ki sawngut ki khynnah kynthei kiba dei ki trai shnong kaba la jia ha Chenga Benga Mela ha rilum Garo.

Ha ka shithi sha u CM ka Jylla, u Marak u la ong, “Ngam pynrem jur ia ka jingshah rahbor, shah thombor bad ka jingshah leh beijot jong ki sawngut ki khynnah kynthei kiba dei ki trai shnong ha Chenga Benga Mela ha Garo Hills ha kaba ka kynhun runar ia kiba la suba jur ba ki dei na ki thain khappud ki la wan rung sha kane ka mela bad leh ia kane ka kam pyntriem bad phet krad noh da kaba iehnoh jyndat ia kine ki lanot hapdeng ka jingsangsot.

“Ia ka ejahar la dep ban ujor, kumta Nga kyntu ia ki bor ba dei khmih na baroh ki ar jylla ba kin shim mardor ia ki sienjam ban thwet bad pynshitom ia ki runar kiba donkti bad ban pynngat ha ki kyndon ain. La kyrpad ruh ban pynioh ia baroh ki lad jingiarap sha kino ki lanot kloi katba lah khnang ban pynthikna na ka bynta ka jingshngain ka jong ki,” u la bynrap.

U Marak u la ong ruh ba kalong kaba sngew bynniaw shibun halor ka jingkhie rasong biang ki kam pyntriem ha ki thain khappud ka Meghalaya bad Assam da kaba shim kabu na ka jingduna ki bor pahara ha ka por ba pynlong ia ka ilekshon. Kine ki runar la iohi kumba ki la wan sha kane ka mela da ka jingthmu kaba sniew, kata khamtam da kaba thmu sniew pyrshah ia ki khynnah kynthei trai shnong ki bym bna ei ei ruh halor ka jingma na ka jingleit sha kane ka mela.

“Kumta Nga kyrpad jur ia phi ban shimkhia mardor bad ban tehlakam ia kiba kum kine ki kam pyntriem kiba mih lyngba ki jaka ialum paidbah kaba buh jingma ia ki khynnah bad ki samla ba lui lui. Ka jingshim khia ka jong phi kan pynthikna halor ka jingpynioh mardor ia ka jingbishar hok bad ban pynshitom mardor ia kito kiba donkti ha kane ka kam pyntriem,” ong u Marak ha ka shithi.

“Nalor kata nga kyntu ruh ia phi ban shimkhia halor ka jingjia kaba la jia ha Ballonggre ha kaba arngut ki khynnah kynthei ki la shah tynrah ha ka trok dumper kaba la phet krad bad wanrah ka jingmynsaw jur ia kawei na ki,” ong u Marak.

Shuh shuh u Marak u kyrpad jur ruh ia ka sorkar ba ka dei ban pynioh ia ka jingiarap bad jingkyrshan na ka bynta kine ki lanot.

Featured Image by Kai from Pixabay