Dawa pynshitom ka KHNAM ia ki Garo kiba trei beain kum ki Rangbah Shnong hapoh ka Hima Mylliem

Syllad | The Rising MeghalayaNovember 27, 2024

Ka Khun Hynniewtrep National Awakening Movement (KHNAM) ha ka 26 tarik Naiwieng ka la dawa na ka Khasi Hills Autonomous District Council (KHADC) ba kan shim ia ki lad jingpynshitom katkum ka ain pyrshah ia kito ki briew kiba dei na ka jaidbynriew Garo kiba treikam beain kum ki Rangbah Shnong hapoh u pud u sam jong ka Hima Mylliem.

Ha ka shithi sha u Deputy Chief Executive Member u Bah PN Syiem, u Working President ka KHNAM u Bah Thomas Passah u la ong, “Namar kata ngi dawa jur ban shim mardor ia ki lad jingpynshitom pyrshah ia kine ki briew katkum ka ain khnang ba ka ain kan ieng rasong ha baroh ki por ki ban wan.”

U la kynnoh ba ki briew kiba dei na ka jaidbynriew Garo ki la treikam kum ki Rangbah Shnong ha ki shnong kum ka Maikholi, Pillangkatta A, Iongkhuli, Mawiong, Gambalbari, Jyrmang, Jolsyiem, Rangsakona, Chibra, Nongspung A bad Nongspung C, kaba dei ka jingpynkhein ia ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007.

U Bah Thomas u la ong ba katkum ka Section 2 (o) jong ka 2007 Act ka la kdew shai ba u Rangbah Shnong ka mut u dei u khliehduh jong ki shnong kiba hap hapoh ka jingpyniaid bad u pud u sam jong ka Hima Mylliem bad kiba dei na ki jaidbynriew Khasi bad ia kiba la thung katkum ki kyndon jong ka ain.

“Halor kane ka bynta la ioh jingtip ruh baka la don ka jingdie ia ki jaka puta hapoh ka jingaibor jong kine ki Rangbah Shnong kiba beain sha ki briew ki bym dei satia ki Khasi, kaba dei sa kawei pat ka jingpynkhein ia ka kyndon 3 (1) jong ka Meghalaya Transfer of Land (Regulation) Act, 1971,” u la bynrap.

Nalor kata u la ong ruh ba kane ka jingleh beain lada ym lah ban tehlakam da ki lynti jong ka ain kan pynduh pyndam ia ka jingmut jong ka 6th Scheduled.