Dawa pynialeh eksam biang ki samla ba bakla ai jingkylli na ka bynta ka NEET Exam ha Ri Bhoi District

Syllad | The Rising MeghalayaMay 7, 2024

Na ka liang ki samla kiba iakhun ia ka exam National Eligibility cum Entrance Test (NEET (UG) – 2024 ha Ri Bhoi District ki la pynpaw ka jingbitar ia ka jingleh thurmur bad dawa na ka National Testing Agency (NTA) ba ka dei ban pynlong biang da kawei pat ka exam hadien ba ki la kum thoh ia ki jingkylli kiba la ai bakla da ka Examination Code Centre.

Kane ka jingjia ka la jia hapoh ka Code Centre ba la ithuh da ka NTA hapoh Alpha English Higher Secondary School ha Nongpoh, Ri Bhoi District.

Katkum ka jingiathuh ki samla pule kiba la ngat ha kane ka apot la ong ba ka jingbakla jong ka Code Centre ka long namar ka jingai artylli ki kot jingkylli, kata kawei jong ka State Bank of India bad kawei jong ka Canara Bank. Ki la ong ba ki hap ban thoh ia kane ka exam da ka por kaba khim, kata 3 kynta, hynrei ki la ioh pdiang haduh artylli ki kot jingkylli bad sdang ban thoh, hynrei hadien shikynta shiteng la pyntip sha ki da ki nongkhmih ba kawei na ki jingkylli ba la ai ka dei kaba bakla bad ba ki khynnah kim dei satia ban thoh ia kane ka jingkylli kaba bakla.

Kine ki samla ki la ong ruh ba haba ki la ioh pdiang artylli ki kot jingkylli, ki la kylli ia ki nongkhmih ba kano na kine kaba ki dei ban thoh ia kaba ki la ong ha ki ba ki dei ban pyrshang baroh artylli ki paper, hynrei dei haduh shikynta shiteng hadien ba ki la ong ba kawei na ki kot jingkylli ka dei kaba bakla bad ba kim dei ban thoh kaba la pynlong ia ki samla kiba sdang thoh shwa ia kaba bakla ba kin shu pynsepei ia ka por, hynrei watla katta ki la pyrshang ia kaba bha tam ban lah ban pyndep ha ka por ba la buh kaba long satang shikynta shiteng.

Ki la ong ruh ba namar ka jingkhim jong ka por kim lah shuh ban pyndep lut ia baroh ki jingkylli kaba ka total marks baroh ka long 720 namar ka jingpyrshang ban thoh ruh ia ka jingkylli kaba bakla, kaba la pynlong ia ki samla ba kin mih shabar ki jaka thoh exam da ka jingsngewkhia ha kaba don ruh napdeng jong ki, kiba iam namar ka jingkylla langknia na kane ka jingleh bakla jong ki bor pyniaid jong ka code centre.

Na ka liang ki kmie ki kpa jong kine ki samla ruh hadien ba ki la ioh jingtip halor kane ka jingbakla kaba jur jong ki bor pyniaid ki la wan her sha kane ka centre ban dawa ban ailad biang ba kin thoh ia ka exam namar ka dei ka jingbakla jong ki bor pyniaid.

Haba kren sha ki lad pathai khubor ka kong WK Blah kawei na kiba la mihkhmat ia ka Code Examination Centre ka la ong ba ki bor pyniaid skul jong ka Alpha English HSS ki la pynpaw ia ka jingkmen ban ioh ka jingithuh na ka NTA na ka bynta ban aijingshakri ia ki samla pule ki ban iakhun ia ki competitive examination ka ban pynsuk shibun ia ki samla pule trai shnong namar ka jingjan sha ka entre ialeh exam. Ka la ong ruh ba watla ki bor pyniaid kim lah ban leit sha ki prokram jingbatai ba bunjait jong ka NTA hynrei ki la ioh lad lyngba ka online ban pynkhreh ia ka NEET (UG) 2024 examinations.

Ka la ong ruh ba ka jingbakla halor ka jingioh pdiang ia ki artylli ki kot jingkylli ba la pynkhreh na ka State Bank of India bad ka Canara Bank ruh ka la pynartatien ia ki bor ba dei khmih jong ka centre, bad ki la pyrshang ban iakren bad ki dkhot ka NTA hynrei kam shym la seisoh satia, kumta ha ka 5 tarik mynta u bnai haba ka exam ka la sdang ka la ioh lad ban iakren bad u Director u Vijay Kumar hadien ba ki sa ioh ia ka jingtip ba kawei na kine ki jingkylli kam long kaba donkam na ka bynta ki samla pule bad kumta ruh mardor ki la pyntip sha ki samla pule kiba la pyrshang ban thoh ia baroh ki artylli ki jingkylli.

Shuh shuh ka la ong ba ki kmie ki kpa jong ki samla pule ki la pdiang ia ka jingpynshai, hynrei dei ha ka 6 tarik mynta u bnai ba ki kmie ki kpa ki la wan biang ban ujor bad ia kane ka kam la iakren bad ki kmie ki kpa bad rai ban thoh sha ki bor pyniaid ka NTA sha New Delhi ban kyrpad ban ailad ban thoh biang ia kane kajuk ka exam na ka bynta ki samla pule hapoh Ri Bhoi District.