Dawa kyntiew bai bylla shet ja sngi ki nongshet ja ha skul, kular u CM ban iakren bad u Myntri Rangbah Duh ka Ri

Syllad | The Rising MeghalayaJune 3, 2019

JOWAI: Ka synjuk jong ki nongshet ja sngi-All Jaintia Mid-Day Meal Workers Union, Jowai (AJMMWU) kila leit ai da ka dorkhat ha u Myntri Rangbah ka Jylla Conrad K Sangma ban kyrpad na u ban kyntiew ïaka bai bylla shet ja sngi naka T.1000/- sha ka T.5000/- shi bnai.

Kane ka seng AJMMWU ka dei ka seng hap hapoh ka shatri jong ka All Jaiñtia Muster Roll Workers and Labour Union, Jowai (AJMRWLU) kaba ialam da u president u Khroo Lamsalangki Pariat bad ki nongïalam jong ki nongshet ja sngi u O Pariat bad ka N Toi nalor kiwei kiwei ki nongshet ja na East Khasi Hills kila leit ban ïakynduh markhmat ïa u Myntri Rangbah bad ban ai ruh ïa ka dorkhat ban dawa kyntiew ïaka jingsiew nalor kiwei kiwei ki jingdawa.

Ka seng ki nongshet ja sngi kila pynpaw ba ka jingtrei jong ki ka dei palat ïaka 8 kynta bad kam dei shuh ka jingtrei shipor bad kala palat ïaka 8 kynta. Naduh mynstep 8 baje manla ka sngi ki hap ban pynbiang ka bam ka dih ïaki khynnah skul bad ban sait khuid ïaka tiar ki tar bad ki jaka shet ha kaba kila klet ïaka kamram ban peit ïaki khun ki kti jong ki bad wat tang ban leit on bad shaw skul ïaki khun ruh kim don por shuh.

Kumta ki la kyrpad ïa u Myntri Rangbah ban kyntiew ïaka bai bylla jong ki bad ban siew ïa baroh shi snem ym tang 10 bnai bad ban pynthikna ban siew bai bylla manla ka bnai bad ban pynrung ïaka pisa hapoh ka account jong ki nongshet ja.

Kiwei kiwei ki jingdawa kalong ban pynithuh ne ai jngbit ba ki nongshet ja ba kin long ki dkhot jong ka Meghalaya building & others constructions welfare board bad ban pynrung ïaki nongshet ja ha ki Health, Social and Pension scheme kiba peit da ka sorkar bad ruh ban ai shuti haba pang ba shitom, armet ne ïoh khun.

Nalor kata ban pynbiang ïaka bording solar light bad ban pynbiang ïaki tyndong shet jingshet ban pynduna ïaka jingthang rnga khnang ban pynneh pynsah ïaka mariang. La pynpaw ruh ba ki kloi ban ïashimbynta haka program thung dieng One Citizen One Tree ha kaba kin thung uwei nongshet ja uwei u dieng bad uwei u muster roll uwei u dieng ha kylleng ki jaka.

U Khroo Lamsalangki Pariat, President ka AJMRWLU, ula ong ba na kaliang u Myntri Rangbah ula kular ban shimkhia ban ïakren bad u Myntri Rangabah Duh ka Ri halor kane ka kam ki nongshet ja sngi bad ki nongiarap shet ja namar ba kiwei kiwei ki jylla kila mynjur ban pynkiew ïaka bai bylla ki nongshet ja Mid-Day Meal.