Dawa kyndang ka HYC ia ki 148 ki longiing ba shong beain ha Them Metor, Iew Mawlong
Ka Hynniewtrep Youth Council (HYC) haka 29 tarik Iaiong ka la dawa ia ka jingtuklar jong u Symbud Myntri Rangbah (Dy. CM) ka Jylla uba khmih ia ka Tnat kam pohiing u Bah Prestone Tynsong ban kyndang ia ki 148 tylli ki longiing kiba shong ba sah beain hapoh Them Metor ha Them Iew Mawlong.
Haba kren sha ki lad pathai khubor hadien ka jingiakynduh ia u Dy. CM, u president ka HYC u Bah Roykupar Synrem u la ong ba na ka liang une u Myntri u la pynpaw ka jingkyndit halor ka jinglap lyngba ka RTI bad pynthikna ban pan jingpynshai na ka Shillong Municipal Board (SMB) hashwa ba ka sorkar kan shim ia ka rai kaba khatduh halor kane ka bynta.
U la ong ba katkum ka jubab ba la ioh na ka jingpan RTI na ka ophis ka SMB, na ki 342 tylli ki longiing kiba shong hapoh Iew Mawlong, ki la don haduh 148 tylli ki longiing ki bym dei satia ki nongtrei jong ka SMB lane jong kino kino ki Tnat sorkar, bad tang 194 tylli ki longiing ki dei ki nongtrei ka SMB lane jong kiwei apt ki Tnat sorkar.
“La pyntip ruh sha ngi ba kiba bun na kine ki nongtrei jong ka SMB ruh ki lah ban dei kiba trei part time lane ki nongsar kiba shu siew bai sngi.Kiba bun na ki, ki dei kiba la shu thung khlem kino kino ki jingpynmih ia ki advertisement, bad don ruh katto katne ki nongtrei kiba la khlad noh hynrei ki dkhot ki longiing ki la bteng ban shong ban sah ha katei ka jaka,” ong u president ka Seng.
“Ha kaba nyngkong ngi sngew ban pynpaw biang kumba la pyntip sha phi kham hashwa ba ki 195 tylli ki longiing kiba shong ba sah ha Them Iew Mawlong, kiba ki dkhot ki longiing jong ki, ki lah ban dei ki nongtrei jong ka SMB lane kiwei pat ki Tnat sorkar ki dei ban ioh ia ki iingsah quarter na ka sorkar, kata tad haduh ka por ba ki dang dei ki nongtrei jong ka sorkar Jylla, bad ha ka jingbym don ia ki quarter ka juh ka ain ka dei ban treikam ia kine ki briew, kata ban ai da ka bai wai iing, hynrei ym dei ban pynkyrpang ia ki lane ban shna kyrpang na ka bynta jong ki,” ong u nongialam ka Seng.
Nalor kata u la ong ruh, “Lada ka sorkar kan ai jaka ei bad ka iing ban pynshna ei na ka bynta kine ki briew, ngi sngew ba baroh ki nongtrei sorkar kin dawa ia kane kajuh hadien habud bad kane kan wanrah ka jingeh kaba khraw ia ka sorkar jylla abd ia ki nongshong shnong ka Jylla kiba noh ia u synniang sha ka pla ryngka jong ka sorkar.”
U la ong kaba ar kalong naslor ba ki nongtrei ka SMB bad kiwei pat ki Tnat sorkar, kiwei pat ki 148 tylli ki longiing ki bym shym la trei hapoh ki tnat sorkar jylla kim don hok satia ban dawa ban pynioh quarter ne jaka shong na ka sorkar.
Kumta ruh ka jingkylli kaba iadei bad ka jingpynkynriah ia kine ki briew kam don satia, bad dei ban klet noh ia ka kam ai jaka ei bad pynshna iing ei. Nalor kata dei ruh ban kyndang noh mardor ia kine ki longiing na kane ka jaka katkum ki kyndon ain,” bynrap u president ka HYC uba la maham ruh ba kano kano ka jingshim rai kaba bakla da ka sorkar halor kane ka bynta kan pynshlur hadien habud ia kiba bun bah ki briew ki bym don jaka ba kin sdang ban leit shong bad pyndap ha ki jaka sorkar.
Shuh shuh u president ka Seng u la ong ba katkum ka jubab RTI la iohi ba bun na kine ki nongtrei ka SMB ki dei kiba la shah thung khlam ki kyndon ain thungkam, kata khlem ka jingpyllait ia ka advertisement.Kiba bun ki samla trai shnong ruh ki lah ban trei ia kine ki kam kiba kine ki briew ki trei mynta.
Kumta ruh u la ong ba ka Seng ka dawa na ka sorkar ba ka dei ban pynioh jaka sah ne quarter tang ia kine ki 195 tylli ki longiing kiba dei ki nongtrei ka sorkar Jylla, katba ia ki 148 tylli ki longiing ki bym dei ki nongtrei sorkar dei ban leh da kaba tyngeh katkum ki kyndon ain bad ban kyndang noh ia ki.
Facebook
Instagram
Youtube
Twitter
Leave a Reply