Dawa ka JSM na ka JHADC ban phiah noh ïaka Elaka Jowai & khynra ïaki bar jylla ba khaii beaiñ

Syllad | The Rising MeghalayaMay 4, 2019

JOWAI: Ka Jaiñtia Students Movement (JSM) Central Body kala dawa na ka Jaiñtia Hills Autonomous District Council (JHADC) ban phiah noh ia ka Elaka Jowai bad ban khynra bad pyndam ïaki Trading license jong bar jylla.

Ha ka dorkhat sha u Chief Executive Member (CEM), JHADC ma Thombor Shiwat, ka JSM kala pynpaw ba ka Elaka Jowai ka kynthup ia ki 83 tylli ki shnong kiba hap hapoh West Jaintia Hills bad East Jaintia Hills District bad  27 tylli ki shnong ki hap hapoh Raid Tuber.

U Leningstar Rymbai President ka JSM, ula ong ba ki nongialam jong kitei 27 tylli shnong naduh u snem 2016 ha u bnai Risaw 7 tarik hapoh ka lama jong ka Raid Tuber Elaka Demand Committee ha Tuberkmai Shnong, East Jaiñtia Hills District kila pynpaw ba kala dei ban phiah noh iaka Elaka Jowai bad ban thaw iaka elaka Tuber. Ula ong ba ka ka lah ban thaw ia ka Elaka Tuber katkum ka aiñ Jaintia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act 2015.

Ka JSM kala dawa ruh ban wanrah biang iaka jinglong tynrai ka Iaw Pynkat kaba don ha Khliehriat East Jaiñtia Hills ba ka kam die jingdie kanlong tang hapdeng Khasi Pnar bad ban pyndam mardor ia ka jingdie jingdie jong ki bar jylla kiba la jyllei katba nang mih sngi kaba la ktah ïaka ioh ka kot jong ki trai ri. La dawa ruh ban khynra ia ki dukan bar jylla ba ki suba jur ba kin don ki kot ki sla ba biang ban khaii pateng bad ban shongdie jingdie ha katei ka iew.

Ka JSM haka dorkhat kaba la ai ha u CEM kala dawa ban buh tnad treikam ka JHADC ha Khliehriat ban pynsuk ïa u paidbah bad ba ki MDC ruh kin wan shisien shi taiew khnang ba kin paidbah kin lait ban leit shaduh Jowai ban leit pyndep kam ha ophis Jowai.

Ka JSM ka la dawa ruh na ka JHADC ban khynra trading licenses bad labour licenses ba jyllei ki bar jylla bym don kot don sla kiba khaii pateng, buh dukan sha kane ka thain kaba la ktah pat iaki trai ri hapoh 15 Jymmang 2019, lym kumta kan shim da kiwei ki rai.

U CEM u la bthah iaka JSM ba ki dei ban wanrah ia ka shithi kaba la soi da ki nongialam shnong jong ki 27 tylli ki shnong hapoh Raid Tuber kiba kyrshan ia kane ka jingdawa.

Ha kaba iadei bad ka jingkhynra Trading License bad labour License pat u CEM ula kular ban shimkhia bad ban buh ïaka tnad treikam ka JHADC ha Khliehriat, u CEM ula  kular ban rah ia kane ka mat ha ka jingialang jong ka Executive Committee.