Dawa ka JARF na u CEM JHADC ban ujor Review Petition sha ka Supreme Court halor ka kam tih dewiong

Syllad | The Rising MeghalayaNovember 21, 2019

JOWAI: Ka Jaiñtia Amalgamated Redressal Forum (JARF) ka seng synroplang jong ki kynhun sengbhalang, ki nongialam shnong bad ki nongmihkhmat paidbah kila leit ban dawa na u Ma Thombor Shiwat, Chief Executive Member jong ka Jaiñtia Hills Autonomous District Council (JHADC) ba un ujor da ka Review Petition sha ka ïingbishar ba hakhlieh duh ka Ri, Supreme Court pyrshah ïaka rai kaba kala pynmih haka 3 tarik u Naitung (July) 2019 kaba la pyngngat ïaka Jylla haka kyndon aiñ jong ka Mine and Minerals (Development and Regulation) Act 1957 ha ka jylla Meghalaya bad kane ka Act kaba buh iaki kyndon kumno ban tih dewiong wat hadien bala weng ïaka hukum khang tih dewiong haka Jylla.

Katkum ka dorkhat kaba la aiti ka JARF sha u CEM JHADC hapoh ka jingïalam u ma Helping Phawa Chairman JARF bad u Leningstar Rymbai General Secretary JARF haka jingïadonlang ki dkhot ka JARF haka sngi Palei kila kyntu bad ai jingmut ïa u CEM, kum u khlieh duh jong ka konsil ban pyllait ïaka konsil bad ka sorkar jylla naka jingpynreikam ïaki aiñ jong ka sorkar kmie namar ba katkum ka khyrnit bynriew kaba hynriew ka ai bor ïaki konsil ban shna aiñ.

Ki katto katne ki mat naka dorkhat jong ka JARF:

 Jingktah na jingkhang tih bad shalan dewiong: Hadien ka jingkhang tih dewiong ha u snem 2014 da ka National Green Tribunal (NGT) ka la wanrah ia ka jingkiew jong ki kam sniew ha ki artylli ki distrik jong ka Ri Jaintia, ka jingbun jong ki khynnah skul kiba pep skul shiteng por, ka jingkhang khyrdep jong ki skul shimet, ka jingshah tan jong ki kali kit dewiong ha ki kompani ai ram, ka jinghiar jong ka ioh ka kot jong ka thain bad jong ka JHADC hi ruh kumjuh, ki long katto katne ki jingeh ki ba mih na ka jingshahkhang tih dewiong bad kaba la ktah ruh ia ka hok long briew man briew, hok kamai ka jih jong ki paradoh parasnam ki jong ngi.

Ka jingpynngat ia ka jylla Meghalaya hapoh ka ain MMDR Act bad Mine Act: Hadien ka jingiakhun ban pyllait ia ka jingkhang tih dewiong kaba la neh san snem kynthih, ka Supreme Court jong ka Ri India ka la weng noh ia ka jingkhang tih dewiong hynrei ka la pynngat ia ka jylla Meghalaya hapoh ki Ain Mines & Minerals (Development & Regulation) Act, 1957, ka Mineral Concession Rules, 1960, ka Mines Act, 1952, ka Environment (Protection) Act, 1986 bad kiwei de ki Ain ha kaba ia dei bad ka kam tih dewiong lyngba ka Rai ba la pynmih ha ka 03/07/2019.

Halor kitei ki jingeh ba la kdew haneng, ka JARF ka sngew dei ban ai jingmut ia JHADC kumno ban pyllait ia ka Jylla na ka jingshahteh shah khum jong ki aiñ jong ka Sorkar Kmie, kata ban pyntreikam ïaka Article 244 bad ka Para 3 jong ka Sixth Schedule.

Article 244: Ban pyntrei kam ia ka bor bad iktiar jong ka District Council kat kumba la pynkup bor da ka Article 244 bad Sixth Schedule jong ka Riti Synshar jong ka Ri India, namar ba katkum kitei ki kyndon Ain, ka JHADC ka lah ban synshar bad shna ia ki Ain ki kanun ha ka ba iadei bad ka kam khyndew kam shyiap, ki Riti ki dustur jong ki nong Jaintia bad ruh ki jingiada na ki Ain kiba treikam sha kiwei pat ki bynta jong ka Ri India.

Para 3 jong ka Sixth Schedule: Ka jingpynksan shuh shuh jong ka Sixth Schedule kat kum ka Para 3, ka pynkup bor ia ka J.H.A.D.C ban shna ia ki Ain ki kanun ha kaba ia dei bad ka khyndew ka shyiap, ki khlaw ki btap, ki um kiwah, ki shnong ki thaw, ki nongsynshar shnong, ka kam bishar bad kiwei kiwei de ki kam kiba don hapoh jong ka imlang sahlang jong ngi kum ki nongJaintia.

United Khasi-Jaintia Hills District (Application of Laws) Regulation, 1952: ka JARF kala ai jingmut ia u CEM ka JHADC ban pyndonkam ka Ain United Khasi-Jaintia Hills District (Application of Laws) Regulation, 1952 ka pynpaw shai ba ka J.H.A.D.C ka lah ruh ban shna Ain halor ki mat jong ka kam dewiong katkum ka Bynta kaba II jong katei ka Regulation ba la kdew haneng. Hapoh jong katei ka Regulation la pynishai kdar ba ka Ain Indian Mines Act, 1923, Indian Forest Act, 1927 badka Coal Mines Labour Welfare Fund Act, 1947 ki long ki Ain ki ba ka J.H.A.D.C ka lah ban pyntreikam.

Review Petition: Ka JARF kala kyrpad 9a u CEM JHADC ban ujor da ka Review Petition pyrshah ia ka rai jong ka Supreme Court kaba la mih ha ka 03/07/2019 khnang ban pyllait ia ka jylla na ka jingteh jingkhum jong ka MMDR Act bad Mine Act khnang ban ioh tih dewiong da kaba jinglaitluid.