Dawa ka FKJGP na ka DMR ban pynsted ïaka jingpynshisha ïaki Challan Dewiong

Syllad | The Rising MeghalayaMay 17, 2019

JOWAI: U President jong ka Federation of Khasi Jaiñtia & Garo People (FKJGP) u Tuesday Lytep ula kyrpad ïaka sorkar jylla bad ka tnad Directorate of Mineral Resources (DMR) ban pynsted ïaka jingpynshisha ïaki challan dewiong khnang ba kin ïoh ïaki syrnod jingpynshisha haka por kaba biang ban shalan dewiong namar ba ka por shalan ïa u dewiong kan kut haka 31 Jymmang.

U Tuesday ula iathuh ba ula wan ban ïakynduh ïa u DMO, ka Jowai ban ïakren halor ka jingshah kyntait ki challan jong ki nongkhaii dewiong bad ula kyrpad ïa u DMO ban pynsted ban phah ïaki Challan sha Directorate of Mineral Resources ban kin ïoh ka syrnod jingpynshisha haka sngi Thohdieng.

Kumba yn shu pynkynmaw ka Supreme Court ka la rai ban shah shalan ïa u dewïong bala dep tih lypa, uba don ba palat 75050 metric ton napoh ka Jylla bad kane ka jingailad kan long tang naduh 17 tarik haduh ka 31 tarik Jymmang bad tang halor ki challan kiba naduh u Nohprah 4, 2018.

Na kaliang ka ophis jong u DMO, Jowai Ma M Syrti ula ong ba ophis jong u ka don ka bor ban pdiang ïaki challan bad lada lap ba ki biang ki phah sha Directorate bad na Directorate kin phah kylla sha u DC ban ai ka syrnod jingpynshisha. Hadien pat ka DMO Jowai kan ai ka NOC ban shalan dewiong bad kam don kano kano ka jingpyrkhing ban pynthymmai ïaki challan jong kino kino ki nongkhaii.

Ka khubor ka ïathuh shuh shuh ba ha kaba ïadei bad ka challan ba ïoh Bison Shylla bad Tuifill Shadap ka ophis u DMO  kala lap ba ki biang bad kala dep ban phah sha Directorate bad kaba sah ka long sa tang ban ïohpdiang ïaka syrnod jingpynshisha na u DC.