Dawa ka ECC ban khang ia ki kharkhana Coke beaiñ ha elaka Sutnga

Syllad | The Rising MeghalayaJune 25, 2021

Ka Environment Co-ordination Committee (ECC) haka sngi Palei kala dawa ban khang shisyndon iaki kharkhana coke kiba treikam beaiñ ha Elaka Sutnga, East Jaintia Hills District.

Haka jingujor kaba la ujor sha u Deputy Commissioner, East Jaintia Hills, u Convener jong ka ECC u ma Rieweh Kupar Sutnga ula ong, “Ngi dawa ba phin shimkhia ban khang shisyndon ia baroh ki kharkhana coke kiba la ieng rasong beaiñ hapoh Elaka Sutnga.”

Ula ong ba ki lyer jakhlia kaba mih na kine ki kharkhana kila ktah iaka koit ka khiah u paidbah baroh salonsar khamtam ia kiba sah marjan bad kine ki kharkhana.

U ma Rieweh ula ong ba katkum ka RTI bala ioh naka Meghalaya State Pollution Control Board (MSPCB) ha u Lber 17 tarik ba ki don tang 5 tylli ki kharkhana coke hapoh ka district kiba la ioh iaka Consent to Operate (CTO) ne ka jingbit ban ioh saiñ rnga dewiong bad baroh kidei kiba la pyntreikam khlem da ioh iaka CTO.

Ka jubab RTI ka ong ba 12 tylli na ki 36 tylli ki kharkhana coke kiba la ioh iaka Consent to Establish (CTE) naka MSPCB bad kiba tam baroh kila pynieng beaiñ ia kine ki kharkhana saiñ rnga dewiong.

U ma Rieweh, ula ong ba baroh kine ki kharkhana saiñ rnga dewiong kila pynkhein iaki kyndon jong ka MSPCB katkum ka notification kaba la pynmih ha u bnai Nohprah 23, jong u snem bala dep halor ban shna iaki kharkhana Coke.

Ka ECC ka sngewkhia jur namar ba ka jingdon kine ki kharkhana kan ktah ym tang iaka pateng kaba mynta, hynrei iaka pateng kaba sa wan namar ba da ka jingthang ia u dewiong kan pynmih iaka tdem bad ka lyer kaba sniew kiba kynthup iaka Carbon Monoxide, Carbon Dioxide, Sulphur Oxide bad kiwei kiwei kiba ktah iaka koit ka khiah u briew.

“Mynta ki nongshong shnong ha ki shnong bapher bapher kila mad iaki jingeh bad haka rta kaba dang rit ruh kila don iaki dak ki shin ban ioh iaki jingpang ba har rukom kaba kynthup iaka jingktah khlieh, tlot ka bor met bad kiwei kiwei ki jingshitom. Shuh shuh lada jur ka jingshah ktah ha kine ki kharkhana kan ktah jingrin pynhiar mynsiem, ktah iaka bor pyrkhat, ka jingshitom klong snam, kaba ktah haduh ka pun ka kha khun bad kaba lah ruh ban wanrah iaka jingiap,” la ong u Rieweh Kupar Sutnga.