Dawa hiar shuki ka VPP ia ki nongialam ka MDA ba shah rem ha ka MP Lok Sabha

Syllad | The Rising MeghalayaJune 5, 2024

U President ka Voice of the People Party (VPP) u Bah Ardent M Basaiawmoit u la dawa ia ki nongialam jong ka Sorkar Meghalaya Democratic Alliance (MDA) ba la lamkhmat da ka National People’s Party (NPP) ba kin hiar shukir noh na ka sorkar hadien ka jingshah rem kput ha ka ilekshon MP Lok Sabha na baroh ki artylli ki seat kata na Shillong bad Tura.

“Hooid ka dei ka jingkylli kaba don nongrim. Lada ki nongialam ka MDA ki dang iai don ha ka burom, ki dei ban shim ia ka jingkitkhieh bad hiar shuki noh na ka sorkar,” ong u Bah Basaiawmoit haba kren sha ki lad pathai khubor haka sngi ba Ar.

U kyrtong ka VPP u Dr. Ricky AJ Syngkon u la lah ban pynrem noh ia u MP ba lai samoi kynthih ka seng Congress u Bah Vincent H Pala da kaba tam haduh palat 3.7 lak vote, katba u Saleng A Sangma na ka Indian National Congress u la lah ban pynshong noh ia ka para jong u Myntri Rangbah ka Jylla  ka Agatha K Sangma da palat 1.55 lak vote.

Na ka liang u Bah Ardent u la shim ruh ia kane ka jingjop kput ka party jong u kum ka rai kaba shai kdar kaba ki paidbah ka Jylla ki la duh noh ia ka jingshaniah ha ka sorkar MDA.

“Ha kaba ka khyllipmat Nga ai ka burom ia u Blei. Kane ka dei ka dak ba U Blei u la pynpaw haba ngi shaniah tylli ha u bad kum ka party ngi da sngewkmen shibun ia kane ka jingai jingkyrshan ba radbah bad ka jingshaniah jong u paidbah,” u la ong.

Une u nongialam ka VPP u la kam ruh ba kane ka result mynta ka sngi ka kren shai bha halor ka jingshisha ba ka VPP kan sa mih bujli ha ka jaka jong baroh ki seng riewlum ha Meghalaya.

“Kumba Nga la ong ngi la iakhun pyrshah ia baroh ki party kiba don ha ka liang synshar namar ka jingmih jong ka VPP ruh ka long halor ka nongrim ka jingpulom ha ka jingai jingshakri da baroh kine ki party sain pyrthei kaba kynthup ia ki seng riewlum, bad ngi ju kren bunsien ba shisien ka sngi ka VPP kan sa mih bujli ha ka jaka jong ki seng riewlum, kata ia kaba ngi la lah ban leh mynta lyngba kane ka result ba phi la sakhi mynta,” u la ong.

Haba pyrto ia ka jingstad jingshemphang jong u paidbah, u Bah Ardent u la ong ba kane ka resulut jong kane ka ilekshon ka dei ka dak ba yn ym don mano mano kiba lah ban shu ialehkai bad u paidbah.