Dang bishar ka Sorkar ia 7 tylli ki case khaii drok ba pynngat ha ka PITNDPS Act

Syllad | The Rising MeghalayaOctober 5, 2024

U Myntri ka Tnad Social Welfare u Bah Paul Lyngdoh ha ka 4 tarik Risaw u la pyntip ba ki don baroh hynniew tylli ki case ia kiba dang bishar bniah na ka bynta ban pynhap hapoh ki kyndon ain Prevention of Illicit Traffic in Narcotics Drugs and Psychotropic Substance (PITNDPS) Act, 1988.

Haba kren sha ki lad pathai khubor u Bah Paul u la ong, “Ki don hynniew tylli ki case kiba dang bishar bniah mynta. Ngi kwah ban pynthikna ba ia ka rukom treikam la leh ha kata ka rukom ba ngin bishar bniah ia ki sienjam jong ngi da kaba pyrkhat bha khnang ba kum kine ki case kin ym lait ei namar ka jingduna ki sakhi satar bad kumta ter ter.”

Haba kdew halor ka jingshah shah kem jong ka snar nongkhaii drok ka Aisa Khatoon 50 snem rta na Paltan Bazar, u Bah Paul u la ong, “Ka jingseisoh bad ka jingshah kem jong kane ka kynthei -Ngan ym khot ka kynthei, Nga tharai kam don hok ba kan shah khot ka kynthei briew namar ka jingdonkti ha ki kam khaii drok mynta la bun bun snem bad ka jingshah pynngat haduh kumba saw tylli ki case hadien ba ka la shah kem noh ha kaba khatduh ka dei da ka jingshim khia jong ka sorkar ba mynta ka la don hapoh ka jingshah set ha ki pulit bad la shim ruh ia baroh ki sienjam ban pynthikna ba kan shah pynngat hapoh ki kyndon ain ba tyngeh hapoh jong ka PIT NDPS Act.”

Haba kylli, une u Myntri u la ong, “Ha ka jingshisha hadien ka jingialang ba dang shen ka jong ngi, ki Dorbar Shnong ka West Shillong ka la phah ia ki jingaijingmut sha ngi, bad ngi la pynrung ia kine ki jingaijingmut bad phin sa iohi ha kaba kut jong une u snem halor ka jingmih shuh shuh ki VDP ha ka sorbah Shillong hi.”