Da ki kali bording pyllait u Myntri Rangbah na ka bynta ban lum ki jaboh ha kylleng ri Khasi Jaintia

Syllad | The Rising MeghalayaFebruary 1, 2024

U Myntri Rangbah ka jylla u Conrad K Sangma haka 1 tarik Rymphang, u la pyllait bad aiti ïa ka kali lum jaboh ba pyndonkam da ka bording lane kata ka Waste Collection e-Vehicles  ha ki blok bapher bapher jong ka East Jaintia Hills, Eastern West Khasi Hills, East Khasi Hills bad West Jaintia Hills, ha ka jingdonlang u Symbud Myntri Rangbah ka jylla u Ma Sniawbhalang Dhar, ka Myntri ba khmih ïa ka tnad ka koit ka khiah ka Kong Ampareen Lyngdoh, U Myntri ba khmih ïa ka tnad PHE u Marcuise N Marak bad  u MLA, ka Umroi, Damanbait Lamare bad MDC, Umroi bad kiwei de ki heh ophisar jong ka tnad PHE bad Shillong Municipal Board. 

Ha ka jingai jingkren ha kane ka sngi u Myntri Rangbah u Conrad K Sangma, u la ong ba ka thong jong ka Swachh Bharat Mission (Grameen), ka sienjam pyntreikam ba la sdang da ka sorkar India, ka dei kaba la thmu ban pynlong ïa baroh ki shnong kiba hap ha ka thup jong ka ODF Plus lane ki shnong kiba la lait na ka jingleit bar pathar. “Mynta ha kine ki sngi ka jylla tang hapoh khyndai bnai ka la kot sha ka 84.33 % hapdeng ba don sa tang 10 % ki shnong kiba ym pat don ha ka thup jong ka ODF Plus. Kane ka lah urlong namar ka jingtrei shitom bad aiti jong ka sorkar bad k tnad sorkar ban trei na ka bynta ban kynjoh sha ka thong ban long kawei na ki shiphew tylli ki jylla kiba don ha kane ka thup”, la ong u Myntri Rangbah.

U lah ong ruh ba ka jingpyllait kine ki kali ba pyndonkam da ka bording ne ki e-Vehicles sha ki shnong bapher bapher ka dei ka sienjam ba ka sorkar ka ïatreilang bad ki shnong ki thaw. “Shisien ba don ka jingïatreilang bad ki shnong ki thaw ryngkat ka jingthmu bad ka jingieid ngi lah ban wanrah ïa ka jingkylla”, la ban u Myntri Rangbah.

Na ka liang u Myntri Rangbah u la pynbna ruh ba manla ka shisien lai bnai kan don ka jingpyntreikam ba ka sorkar bad ka imlang ka sahlang kin snohkti lang ha ka ban pynkhuid ïa ki jaka sor bad ki shnong ki thaw. “Ban sdang naduh ka bnai mang tyngka jong une u snem, manla ka shisien lai bnai ha manla ki distrik, blok bad ki shnong ka sorkar bad uwei pa uwei u nongshong shnong kin snohkti lang kawei ban pynthymmai halor ka jingaiti  ban pynneh ïa ka jingkhuid jingsuba ki shnong  ki thaw bad kumjuh ruh ki jaka sor,” shuh shuh u la bynrap bad ong ba ka jingkhuid jingsuba ka long ka bynta ba kongsan jong ki trai ri trai muluk bad katkum ka lariti ka ri India, “ki don ki por ba ngim shym a lah ban bteng ïa kane ka lariti bad ki dustur bad dei ka por kaba batai ïangi ba ngi donkam ka jingpynthymmai biang bad buddien sa shisien pat kine ki riti dustur jong ki kmie ki kpa tymmen. “U la kdew ruh ba ka long kaba donkam ban pynneh ka jinglehkhuid hapdeng ki samla bad ka jingdonkam ban pynneh ka jingkhuid jingsuba jong ka sawdong sawkun.

Ha kawei pat ka liang ha ka jingai jingkren na ka liang u Marcuise M Marak uba long u Myntri ka tnad PHE u la ong ba ka jingpyllait bad aiti kine ki kali ka pyni ïa ka sienjam ba kongsan ba ka sorkar ka la shim halor ka jingkhmih lynti ban ïohi ïa ka jylla Meghalaya ba kan long kaba khuid ba suba. Na ka liang une u Myntri u la pyntip ruh ba ka don ka jingbuh thong ba ha u snem 2024-2025 ka jylla kan kot sha ka 100 %  ha ka ODF Plus, da kaba shna haduh 1,10,240 ki jaka leitbar ba thikna  ha ki ïing jong ki briew shimet kumba 1553 ki dei kiba ïoh jingïarap lyngba ka skhim  PMAY, kumjuh ruh yn shna 570 tylli  ki Community Sanitary Complex Unit ne ki jaka leitbar paidbah bad ka jingbuh 18 tylli ki Fecal Sludge Management  ne ki jaka ban saiñ ki jakhlia kynthup ruh halor ka jingpyntreikam ïa ka  Govardhan ne ka jaka ban saiñ ki jaboh ba lah ban pynum bad ka ban saiñ ïa ki plastik ha kylleng ki jaka jong ka jylla.

Ki don baroh 207 tylli ki e-Vehicles kiba la aiti sha ki blok bapher bapher jong ka Khasi bad Jaintia Hills distrik. Kum kane kajuh yn sa pynurlong ruh ha Garo Hills la pynpaw ki heh sorkar.