Da ki jingthoh maham briew pynieng ki Karbi ha Khanduli

Syllad | The Rising MeghalayaJuly 29, 2023

Katba ki nongshong shnong Khanduli ki iai ap khmih lynti da ka jai jai ia ka jingpynbeit noh ia ka jingiakajia bad ki Karbi kiba long ki marjan marpa jong ki kaba la neh palat lai bnai kynti.

Phewse ki Karbi kiba shong basah ha Am-ih kumba khot ma ki bad Myni kumba tip ki Pnar ki don da kawei ka jingthmu na shalyndet bad kim pat kwah satia ia ka jingiasuk bad ki nong Khanduli namar ki dang bteng ia ka jingkyntur jong ki sha u pud u sam jong Khanduli.

Haka step sngi Saitjain, ki dkhot jong ka Village Defence Party (VDP) na ka Shnong Am-ih ki la sieh syndet ia kawei ka Signboard kaba maham ia jingleit jingwan jong ki briew palat ia katei ka jaka bala pynieng ia ka sign board.

Kitei dkhot jong ka VDP ki la pynieng ia ka signboard palat 50 ne 60 meter na ka jaka bala pynieng ia ka Entry Tax Gate da ka Karbi Anglong Autonomous Council (KAAC) ha Khanduli.

Hadien bala ioh jingtip halor katei jingpynieng signboard da ka VDP Am-ih, ki nongialam jong ka Dorbar Shnong Khanduli ki la ujor sha ki pulit jong ka Saitsama Outpost.

Ki pulit Saitsama ki la wan hiar mardor sha katei ka jaka bad ki la phah ia ki pulit Assam kiba shong ap pahara ha ka Entry Tax Gate ban weng noh ia katei ka signboard ban lait na kano kano ka jingjia.

Ki pulit Assam ki la ai ia ka jingiatreilang jong ki bad ki la weng noh ia katei Signboard.

U Waheh Shnong jong ka Khanduli u Ma Y Nongspung u la pynpaw ia ka jingsngewkhia jong u halor katei ka jingbteng kyntur pud jong ka Assam.