Da ka prokram iasyllok ban pyni lynti iaki khynnah skul pynlong ka ophis BDO Mairang

Syllad | The Rising MeghalayaApril 3, 2023

Kum shibynta ban pynshai bad pyni lad pyni lynti ia ki khynnah pule ka Eastern West Khasi Hills District halor ki lad iohkam iohjam ha ka liang ka tnat hospitality kiba kynthup ia ka iohkam iohjam lyngba ka kam jngohkai pyrthei, ka ophis jong ka Block Development Officer, Mairang C&RD Block ha ryngkat ka jingiatreilang bad ka Indian Institute of Hotel Management, Shillong kila pynlong ia ka prokram career counselling na ka bynta ki khynnah pule ka thain kiba don jingthmu ban leit pule ha kane ka lain haka sngi Nyngkong.

Ha kane ka prokram ia kaba la pynlong ha Tirot Sing Memorial Hall Pyndengumiong, Mairang la wan ban iashimbynta da i Dr. LR Hynniewta, BDO ka Mairang C&RD Block, u Bah S. Khonglah, uba dei u Lecturer ka IIHM, Shillong, I Kong S. Wahlang, iba long i Demonstrator ka IIHM, Shillong , ki nonghikai bad ki khynnah pule jong ki skul bad kolej ka thain kiba kynthup ia kito kiba la wan  na ka Mairang Presbyterian Higher Secondary School, Mairang, ka Khadsawphra College, Mairang, ka St. Thomas Higher Secondary School, Mairang bad ka Myriaw RMSA Higher Secondary School, Myriaw.

Ka jingthmu jong kane ka prokram ka long ban hikai ban kdew lad kdew lynti ia ki khynnah pule ka thain halor ki lad iohkam iohjam lyngba ka tnat jngohkai pyrthei kaba long kawei na ki tnat kiba la nang kiew na ka por sha ka por lyngba ka jingiohkam ioh kamai jong ki nongshongshnong.

Ha kane ka sngi, ki khynnah pule ka thain ki la ioh jinngpynshai ruh halor ki jait jingpule ia kiba lah ban ioh hapoh ka Indian Institute of Hotel Management, Shillong kiba kynthup ia ka B.Sc in Hospitality & Hotel Administration, ki Diploma Course na ka bynta kito kiba lah dep ia ka Class 12 bad ruh ki Short Term Certificate Course na ka bynta kito kiba lah dep ia ka klas 10. (SDPRO, Mairang)