Da ka Orange Festival yn pynlong ha Narwan, kan don ruh ka jingiakop bam Sohniamtra

Syllad | The Rising MeghalayaJanuary 16, 2024

Ka Narwan Multipurpose Co-Operative Society Ltd kan pynlong da ka tamasa Sohniamtra kaba arsngi kaba tip kum ka “Narwan Orange Festival” haka 30 bad 31 tarik Kyllalyngkot ha madan Mooknor Narwan East Jaintia Hills District.

Ka shnong Narwan kadei ka shnong kaba la paw bha haka jingrep ia u soh niamtra. U sohniamtra ba mih na kane ka Shnong udei uba bang ba shngiam bad lah ruh ban ioh khamslem haduh u Lber (March). Ki paidbah nongshong shnong ki im ja da ka jingrep soh bad kiwei kiwei de ki mar rep mar riang.

Kumban shu pynkynmaw ba u Sohniamtra na kane ka shnong dangshen la shalan sha Dubai, lyngba ka jingprat lynti jong ka sorkar lyngba ka tnad kam rep kam riang.

Ka shnong Narwan kaba hap hapoh ka Sutnga Saipung Constituency ka jngai 95 kilomitre na nongbah Shillong bad 34 kilomitre na nongbah Jowai.

Haba kren bad ki lad pathai khubor u Waheh Shnong ka Narwan u Bah Lamsuk Langstang ula ong, ka jingpynlong ia kane ka tamasa Sohniamtra kadei shibynta ba ki paidbah kin iohlad ban wan jngoh da lade iaki bri soh kiba don da ki phew snem mynshwa haka Shnong Narwan bad ruh bad ban pynithuh iaki jaka kiba itynnad kiba don sawdong sawkun ka Shnong Narwan.

Na kaliang u ma Leo Shadap Secretary Shnong Narwan ula iathuh, ha ki arsngi jong ka tamasa sohniamtra yn don shibun ki jait pynbyrngia iaki paidbah kynthup ki jingrwai na ki nongrwai bad kynhun ba paw ka District bad Jylla.

Haka sngi sdang kata haka 30 tarik yn don ka Marathon, ka Awareness program shaphang ka jingsniew jong u drok, Trekking, ka jingpyni paidbah iaka phlim NUKSA, Fashion Show bad ki jingrwai jingtem.

Haka 31 tarik kan don ka Cycle Racing, ka jingleit jngoh iaki bri sohniamtra, ka jingiakop khoh snep soh, iakop bam sohniamtra, kan don ruh ka jingiakop Miss Narwan Orange Festival 2024 nalor kiwei kiwei ki jait pynbyrngia.