Da ka khusnam TREYSEFA certificates sam ka Myntri sha kiba pyndep ia ka training na ka BATC

Syllad | The Rising MeghalayaJune 20, 2024

Ka Myntri ka Tnat ka rep ka riang ka sorkar Jylla ka Dr. M Ampareen Lyngdoh ha ka 19 tarik Jylliew ka la sam ia ki khusnam sha kiba tbit tam ha ka TREYSEFA certificates ha ryngkat ka song pisa sha kito kiba la pyndep ia ka jingshah hikai hapoh ka Basic Agriculture Training Centre (BATC) ha Upper Shillong.

Haba aijingkren ha ka jingialang ka Kong Ampareen ka la ong ba watla kam shym la wan na ka longiing kaba rep ba riang hynrei naduh kine ki shi snem ba la dep ba ka la shimti ia kane ka tnat ka la ioh shibun ki jingmut kumno kane ka tnat ka treikam.

Ka la ong ruh, “Ngi la shu iohi lyngba ki kotkhubor halor ka jingkiew dor jong ki jhur ki jhep ha ki iew ki hat, hynrei ngi donkam ban pynkhlain ia kane ka kam bad ban pyntreikam ia ki policy bapher bapher. Ka la ong ruh ba kum ka Jylla ngi donkam ban tip balei ba ki jhur ki jhep kiba ngi pynmih ngim lah ban ioh pahuh ha ki iew ki hat hapoh la ka jong ka jylla.”

Nalor kata ka la kyntu bad pynshlur ruh ia ki samla ka Jylla ba kin shim ia ka rep ka riang kum ka lad ioh kam ioh jam khamtam namar ka long kaba shem shitom ban ioh kam sorkar ha kane ka juk jong ka jingialeh. Ka la kyntu ruh ia kine ki samla kiba la pyndep ia ki jingshah hikai ba kin iasam lem ia ki jingtip sha kiwei pat khnang ba kan long ka jingmyntoi na ka bynta kiwei ruh kumjuh.

Ha kane ka prokram na ka liang ka Kong Ampareen ha ryngkat ka Secretary ka Tnat ka rep ka riang ka Kong Isawanda Laloo ki la leh burom bad sam ruh ia ka song pisa sha kine kiba la pyndep ia ka training na ka bynta u snem 2023-24, bad hadien ka la don ruh ka jingpyllait paidbah ia ka kot Basic Agriculture Training Centre (BATC), Upper Shillong.