Da ka jingrah lama ïong yn sdang ka jingïakhih dawa ILP ka CoMSO ha Jylla

Syllad | The Rising MeghalayaApril 15, 2019

SHILLONG: Ka Confederation of Meghalaya Social Organisations (CoMSO) haka jingïalang kaba long haka 13 tarik une u bnai ha sor  Shillong ka la rai ban sdang noh ïa ka prokram iakhih da kaba rah lama ïong haka 23 tarik une u bnai ha baroh kawei ka jylla ban pynbor ïaka Sorkar Jylla ban pyntreikam noh ia ka ILP hapoh ka Jylla.

Ka CoMSO ha u kyrwoh bala phah da ki vice chairman, u Nikman Ch Marak bad u Lamphrang Kharbani kila pynpaw ïa ka jingsngewkhia halor ka jingleh suki bad bym suidniew jong ka Sorkar Jylla ban wanrah noh ïa ka Aiñ ILP na ka bynta ban ïada ïa ka jingrung kyrthep ki mynder ri sha kane ka Jylla watla haki jingïakynduh bad u Symbud Myntri Rangbah Bah ka Jylla Bah  P Tynsong u la kular ia ka kynhun ba ka Sorkar Jylla jan pyntreikam noh kloi ia ka ILP hapoh ka Jylla.

Halor kane ka jingsngap mynthi bad jingleh sting jong ka Sorkar Jylla, na ka liang ka CoMSO kan sdang ïaka prokram ïakhih da ka “Black Flag Day” haka 23 tarik une u bnai ha baroh kawei ka Jylla ha kaba ki dkhot jong ki seng bapher bapher kiba don hapoh ka CoMSO kin pyndeng lama iong ia ki riewpaidbah, kin wah lama iong ha ki kali bad ruh ban wah ïaki jingthoh halor ka jingdawa ILP bad pynrem ia ka Sorkar Jylla halor kane ka bynta.

Hadien kane ka CoMSO ka san pynbna ïa kiwei pat ki jingiakhih ban pynbor ïaka sorkar ban pyntreikam ïaka ILP.