Da ka Committee thaw ka Sorkar ban khmih halor ki mat ba iadei bad ki kali Tourist ha ka Jylla

Syllad | The Rising MeghalayaSeptember 26, 2024

Ka Sorkar Jylla ka la thaw da ka Committee ka ban khmih halor ki mat kiba iadei bad ki kali Tourist Taxi kiba kamai hapoh ka Jylla.

Haba pyntip ia kane ha ka 25 tarik u Nailur, u Myntri Rangbah ka Jylla u Conrad K Sangma ula ong, “Nga la bthah ia u Director ka Tnad Tourism ban thaw ia ka Committee kaba rit ka ban bishar bniah halor ki kam kiba iadei bad ki Tourist kamai bad haduh katno ka jingshah ktah ka jong ki, kiei ki jingai jingmut bad ki sienjam ban shim khnang ban lah ban pynbeit, katno tylli ki kali Tourist ki don bad katno tylli ki kali Tourist kiba wan na shabar ka Jylla.

Kane ka Committee kan don ia ki dkhot na ka Tnad Tourism, Law, Police bor pyniaid District bad kiwei kiwei ki Tnad namar ki kynhun kiba don bynta ha kane ka kam.

“Ngi kwah ban wan ha ryngkat bad ka rai, bad shisien ba ngi la lah ban ioh jingkhein bad bishar ia ka jinglong jingman ha ka lynti kaba bniah yn ailad lang kumjuh ia baroh ki kynhun ba kin pynpaw ia la ki jong ki jingsngewkhia ha kaba iadei bad kane ka phang,” ong u Conrad.

“Kumba nga ong, ka long kaba donkam ia ki Association jong ki Taxi bad ki nongniah da lade ba kin ia don lang ban iakren bniah bad ki khnang ban tip bad sngewthuh ia ki jingeh, kiei ki jingtywa ba ki don, ki dei ki sienjam kiba don hakhmat jong ngi, kaei ka lynti kaba ngi lad ban shim, kaei ka ban jia lada ngi shim ia kine ki sienjam nalor kiwei pat,” u la bynrap.

“Kumta nga kyrmen ba ka Committe u Director kan sa iakynduh shen ia baroh bad kan sa pynkloi ban ia ia ka kiphod sha ngi bad shwa kane, ngan sa khot ia ki kynhun bapher bapher kiba don bynta ban iamir jingmut bad khmih ia kaei ka sienjam kaba ngi lah ban pyniaid shakhmat ha kaba iadei bad kane ka phang,” u la ong.