Cooch Behar Trophy: Tam ka Baroda haduh 430 run iaka Meghalaya, ap iaki batsmen ban leh eiei

Syllad | The Rising MeghalayaNovember 30, 2024

Ka Baroda ka la sei madan ia ka sap bad ka jingtbit ka jong ka ha ka jingiakhun pyrshah ia ka Meghalaya ha ka sngi kaba ar jong ka U-19 men’s Cooch Behar Trophy Elite Group A ba la long ha madan ka MCA ha Polo da kaba ka la lah ba kan tam da kumba 430 ron ha ka pali wan tied ba nyngkong ka jong ka haka 29 tarik Naiwieng.

Haba wan ban bteng ia la ka pali na ka 55/0 hadien ba ka Meghalaya ka la kamai 178 ron, ki batsman ka Baroda, la shem pynban ba ki la muja bha ialade ban ialehkai ha kane ka madan, khamtam lei lei na u Nitya J Pandya ba dei artad ruh u kapten ka kynhun uba la lah ban kamai 177 ron na ki 183 tylli ki bol ha shwa ba un out noh ha u Gaurav Thakuria.

U Nitya J Pandya u dei ruh u player ba la mihkhmat ia ka kynhun ialehkai U-19 jong ka India ha kaba u la lah ban kamai ia ki artylli ki half century ha ka jingiakhun pyrshah ia ka Australia.

Katba u Gaurav (1/89 ha ki 11 over) u nongkawang bol leg spin wat la ula ai run khambun, hynrei ula jop ban tehlakam iaka jingkamai run bad pynliem ia u Nitya. U Smit Rathva uba la kyrshan ha ka jingïatreilang bad ka Nitya u la kawang naphang iaki nongkawang bol ka Jylla lada dei ki pacer ne u spinner kam pher haduh ban da poi sha ka double century jong u shwa ba un liem noh 201 na ki 245 tylli bol ha Angkit Tamang (2/127 ha ki 25). U la tied 21 tylli ki 4s bad phra tylli ki 6s, kynthup ia kawei ka down the ground shot ba un kamai 150 run

Na ka 482 ron hadien ba la duh noh tang uwei u wiket jong u Rathva, shu san kynsan ka Baroda ki la lap ba hap noh 6 wiket hadien ba ki la kamai 608 ron, ka bym da dei eh ba ki khyllem ki batsman, pynban ka shu long tang ka dak jingkylla kaba wanrah jingkmen ia ka kynhun ialehkai jong ka Meghalaya, kiba la hap ban jaw shisha bad syep bad syar, ha kaba u Vishvas u la lah ban kamai 143 ron na ki 127 tylli ki bol.

Na ka liang ki nongkawang bol jong ka Meghlaya uba la ioh ban khur bun tylli ki wiket dei u Salchang M Sangma uba la khur 3 wiket na ka bynta 83 ron na ki 12 over,ha kaba kine ki lai tylli ki wiket kidei kiba u la ioh ban khur tang hapdeng ki 7 tylli ki bol bad ba u la don teng ha ka thong jong ka hat-trick.

Shuh shuh ha kane ka kynti la shem bad iohi ba ka Meghalaya ka la pyndonkam haduh 9 ngut ki bowler bad kyrmen ba lashai ka sngi kaba lai ba dang step kin lah ban pynhap lut ia ki wiket ba dang sah ka Baroda, da kaba ap khmih lynti ba ki batsman ki leh pat ia kaei kaba ka kynhun ka donkam.

Hynrei ban shu ia khmih pat, ka jingiakhun hi kan nym dei kaba suk ia ka Meghalaya ha kane ka kynti kaba mynta.