Conrad K Sangma kum CM haka sien kaba ar, haka sien nyngkong eh wan sakhi PM Modi don aiu sha lyndet?

Syllad | The Rising MeghalayaMarch 7, 2023

U Chief Minister Conrad K Sangma ula bam smai kum u chief minister haka sien kaba ar bad ha kane ka kynti kan long ka burom kaba khraw iaka jylla ba wat u Myntri Rangbah Duh ka Ri u Narendra Modi haka sien nyngkong eh ula wan sakhi iaka jingbam smai ki 12 ngut ki myntri ka sorkar MDA-2 haka sngi ba Ar.

Uba bun balang ula buh jingkylli ia ka jingwan iuhkjat u Myntri Rangbah Duh ka Ri khah khah ha Jylla bad ki ong don aiu sha lyndet kane ka jingwan jong u, wat la ka BJP ka ioh jingjop tang ar ngut ki MLA. Uwei na ki MLA u bah AL Hek ula bam smai kum u Myntri haka kynhun myntri ka MDA-2.

Kawei pat ka jingkylli kaba buh u paidbah ka long hato ka jingkynnoh bamsap da ki nongialam BJP iaka sorkar Meghalaya bad kiwei kiwei ki jingdawa tohkit halor kam bamsap hadien bala thaw iaka sorkar synrop kan kut noh?

Nalor u Modi la iadonlang ruh u Union home minister Amit Shah, u president BJP u JP Nadda bad chief minister ka Assam bad chairman NEDA Himanta Biswa Sarma ha kane ka jingbam smai.

U Lat ka Jylla Phagu Chauhan ula shim ka bynta ban pynbam smai iaka kynhun myntri ka MDA-2

Ki myntri ki kynthup ia u Prestone Tynsong bad Sniawbhalang Dhar kum ki deputy chief Minister. Ka Kong Ampareen Lyngdoh kaba dei tang maka ka myntri kynthei.

Kiwei pat ki myntri ki dei u Comingone Ymbon, AT Mondal, Marcuise N Maram Rakkam A Sangma, Paul Lyngdoh, Kyrmen Shylla bad Shakliar Warjri.

Kane ka sorkar kaba ialam da ka NPP ka ioh ka jingkyrshan kaba haduh 45 ngut kynthup iaka PDF nalor ka HSPDP, UDP, Independent bad ka BJP.

 U Conrad Sangma ula ong ba “Ngi la dep buh nongrim ha ki san snem kiba la dep ha ki bynta bapher bapher bad mynta ngin bteng ban duriap ban treishitom iaki jingtrei kiba la dep ban dap biang u paidbah ka jylla.”

“Ngin pynleit jingmut ruh ban kyntiew iaki kam kiba la dep ha ki san snem ban pynthikna ban pynbha pynmiat iaki jingtei. Ngi la treishitom ha kaba iadei ban pynkiew iaka imlang ka sahlang kynthup iaka koit ka khiah bad pule ka puthi,” la ong u Conrad bad bynrap “Ngi la shimkhia bha ha kaba iadei bad ka jingdonkam ki samla kiba iadei bad ka sengkam bad bad aikam aijam bad kine ki long ki mat ba ngin shimkhia ban pynleit jingmut ban trei ha kane ka sorkar kaba mynta,” la ong u Conrad.

Ha kaba iadei bad ka jingthung Dy Chief Minister ar ngut ula ba kane kam dei kaba thymmai hynrei kaba la juh leh mynshuwa. Kadei ruh n aka bynta ban lah ban shakri khambha ha ki bynta bapher bapher

Ula ong ruh ba ha kaba iadei bad ka jingbatei kam iaki kynhun myntri yn pyndep hapoh 24-48 kynta.