Bynñiaw ki nongkitkam Congress bym don jingïalang paidbah haka jingwan Rahul Gandhi

Syllad | The Rising MeghalayaMarch 29, 2019

SHILLONG: Khnang ban pynkhlaiñ shuh shuh ïa ka jingïalap jong ka Congress na ka bynta ka elekshon MP sha ka ïing Dorbar Thawaiñ jong ka Lok Sabha ha Shillong,  U President jong ka All India Congress Committee (AICC) u Rahul Gandhi un wan ïuhkjat sha ka Nongbah Shillong ha ka 4th tarik u bnai Iaiong

Ka party ka la pynbeit ïa ka jingïakynduhlang jong ki nongtrei ka party, ki MLA, ki MDC bad ki nongkitkam jong ka ha State Convention Hall, Shillong ha ka por 10 baje mynstep.

U Rahul Gandhi un ai ïa ka jingkren jong u ha kane ka jingïakynduhlang haba u kyrtong MP jong ka party U Ma Vincent H Pala un don lang ha kane ka sngi.

Ha kawei ka liang, ki nongkitkam jong ka Seng Congress kiba la ïoh jingtip halor ka jingwan jong u Rahul Gandhi ki la pynpaw ïa ka jingsngew bynñiaw jong ki halor ka jingbym pynlong da ka jingïalang paidbah ha Shillong haba ki paidbah kin ioh ban wan sngap dalade ïa ka jingkren jong u President rangbah ka Seng Congress.

Kila ong ba lada u Rahul Gandhi un ai jingkren ha ka jingïalang paidbah ki nongkyrshan Congress na baroh ki district ha Khasi Jaintia kin ïoh ban wan sngap bad kane kan sa ïarap shibun ia ka party kaba ïakhun pyrshah mynta ïa u kyrtong bala pynieng da ka Sorkar MDA jong Jylla Meghalaya.