Bym ioh tih dewiong khot jingïalang ka JARF

Syllad | The Rising MeghalayaNovember 8, 2019

JOWAI: Ka Jaintia Amalgamated and Redressal Forum (JARF) ka kynhun jong ki sengbhalang, ki nongrep, ki nongniah trok, ki nongbylla bad ki riew pawkhmat ba kynthup iaki MLA, MDC barim kala khot ka jingialang paidbah haka 9 tarik une u bnai  haka por 11 baje mynstep ha madan ïalehkai ka shnong Tuber-Shohshrieh, East Jaintia Hills District namar ka jingbym ioh ban tih dewiong.

Ka JARF lyngba u Secretary ma LS Rymbai ula pynpaw ba ka synjuk ka dap da ka jingsngewkhia halor ka jinghiar ka ioh ka kot ka kamai ka kajih naduh ba la shah khang tih dewiong na u snem 2014 bad ka wer ia baroh ki paidbah kiba shah ktah ha ka ioh ka kot lyngba ka jingshah khang tih dewiong ban wan sha katei ka jingialang ban ïathir sani halor ka hukum jong ka Supreme Court kaba la dep ban pyllait ia ka jingkhang tih Dewiong, hynrei haduh mynta kim pat ïoh tih ïa u dewiong bad ba ki paidbah kim sngewthuh ïaka aiñ MMDR Act.

U ma Rymbai ula ong ba ha kane ka jingialang paidbah kin don ki nongiasaid aiñ bad kiwei kiwei ki riew pawkhmat ka Jaintia Hills ki ban ai ka jingpynshai halor ka MMDR bad kiwei kiwei ki jingeh ba iakynduh u paidbah halor ka kam dewiong bad ka jinglong trai jaka. Ha kane ka jingialang yn pynskhem ruh iaki nongialam ka JARF.