Bym ioh bai musur khyndew phah pynsangeh ker sainar shiah bad shna surok ka KSU

Syllad | The Rising MeghalayaApril 5, 2019

KHLIEHRIAT: Ka Khasi Students’ Union (KSU) Narpuh Circle haka sngi Palei ka la leit iakynduh ia u Deputy Commissioner, East Jaiñtia Hills District  Bah FM Dopth ban dawa pynsangeh shwa ïa ka jingpyntrei ïaka u surok bad ker sainar shiah ha khappud bad ka Ri Bangladesh naduh Lailong shaduh Huroi bad Hingaria.

Ka KSU kala dawa ban pynsangeh shwa ia kane ka kam ka long halor ba ka sorkar kam pat dep ban siew iaka bai musur khyndew (Compensation) sha ki trai jaka ba shah ktah na katei ka jingpyntrei surok bad ker sainar shiah (Fencing).

“Mynta ka ka jingtrei ka iaid shait shait, ki bri kwai bri tympew jong ki nongshong shnong ha khappud ki la julor phom, hynrei haduh mynta kim pat ioh iaka bai musur khyndew,” ong u SL Suchiang, Publicity Secretary KSU Narpuh Circle.

Ka KSU kala leit ïakynduh  ïa u DC East Jaiñtia Hills hapoh ka jingialam u KS Suchiang, President, Deibormi Dkhar, General Secretary ryngkat ka jingiadonlang ki trai jaka bad ka jingsynran lang ki nongialam KSU Jaiñtia Hills District unit u Ohibait Dkhar, Garland S Manner, General Secretary, u Shaniahskhem Dkhar Assistant Finance Secretary.

U DC u la ong ba baroh ki paidbah kiba shah ktah haka jingshna surok bad ker sainar ki dei ban ai kyrteng sha ki Waheh  Shnong bad ban pynpoi sha ka ophis jong u ban pyndep ïaki jingdonkam baroh.

Shuh shuh ha kawei pat ka khubor ha kaba iadei bad ka bai musur na ka bynta ka surok NH-6 Jowai Badarpur Road, u DC u la iathuh ba 90% la dep siew sha kito kiba shah ktah ki jaka puta kum ki jingthung jingtep bad kaba sah mynta ka long ka jingsiew ia ki ïng briew (Building).