Buh thong ka BJP ban jop 400 seat haka election Lok Sabha

Syllad | The Rising MeghalayaJanuary 5, 2024

U National vice president ka seng BJP uba peit ia ka Meghalaya u Dr M Chuba Ao haka sngi Palei u la ong ba ka party ka buh ia ka thong ban jop 400 tylli ki seat ha kane ka election MP Lok Sabha ka ban wan.

Haba kren sha ki lad pathai khubor u Ao ula ong “Ka thong ka jong ngi ka long ban ioh 400 tylli ki seat ha kane ka kynti kaba mynta. Kumta ngin hap ban leit sha kylleng ia kaba ngim shym la leh ha ka ilekshon ba la dep, ngin pyrshah katba lah ban poi sha ki.”

U la ong ba ka kaiphot jong ka party ka pynpaw ia ka jingkyrmen bad pynpaw ia ka jingkyrmen ba kin ioh ia ka jingjop bad ka thong ka dei mynta ka sngi. U la kubur ruh ba ki don katto katne ki seat ba ka party ka tlot hynrei na ka liang ka Party kan trei shitom ban ioh jingjop ha kum kita ki seat.

“Ha ki artylli ki election ba dang shu dep, ngi la sakhi ba ka Party kam shym ka seisoh hynrei mynta ka kynti ngin trei shitom ban pynsngewthuh ia ki paidbah khamtam ha kaba iadei bad ka national level bad kumno ban pynpoi sha man ki paidbah” ong u nongialam ka BJP.

Nalor kata u la ong ba ka party kan iakhun ia kane ka election Lok Sabha tang marwei hi. “Ngin ym ia pein bad kino kino ki party sain hima. Ngin pynkhlain da lade hi, balei ngin pynioh kabu ia kiwei.Kumta ruh ngi la shim ia ka rai ban iakhun khlem kano kano ka jingiateh lok bad kan ym don ruh ka jingiabhah seat,” u la bynrap.

Haba kylli, u Ao u la ong ba ka BJP ka khlain bha napoh Shillong bad Tura parliament seats ha Meghalaya. “Ha ka jingshisha ngi khlain ha baroh artylli ki Seat, ngi la rai ban nang pynkhlain shuh shuh iaka party da ka ba leit sha u paidbah naduh ka tynrai” ula ong.Ula ong ba kila don bun ngut kiba pan Ticket naka Party hynrei kiba pan Ticket kidei ban ioh ka jingpdiang sngewbha jong  ki paidbah.

Halor ka jingkylli la ka party kan pynieng ne em ia u MLA ka Pynthorumkhrah u Bah AL Hek u ba dei ruh u Myntri Sorkar, u Ao ula ong “Nga la iohi ha ki lad pathai khubor hynrei ngam pat iakren bad u, hynrei ia kane ka Party kan sa iakren namar ym lah ban shu pdiang ia kaei ba thoh ha ki kot hynrei ngi donkam ban ioh ban iakren markhmat”. U la ong ruh ba ka party kan jied ia ki kyrtong napdeng ki nongkitkam bad dkhot jong ka party.

“Ka bhah kyrpang na ka bynta ki kynthei ka dei kaba don ha ka mat ka jong ngi.Ngin khmih namar ka don ka bhah kyrpang na ka bynta ki kynthei, hynrei lada kam don ka jingpdiang da la ki jong ki constituency jong ki jong ki kan sa mih ka jingeh namar ngin iakhun ban jop bad kumta ngi dei ban jied ia ki kyrtong kiba biang tam,” u la ong shuh shuh.