Buh mawnongrim u Dy CM ia ka sub-divisional hospital; plie ia ka FRU ha Pynursla CHC

Syllad | The Rising MeghalayaNovember 29, 2024

U Symbud Myntri Rangbah ka Jylla u Bah Prestone Tynsong ha ka 28 tarik Naiwieng u la buh ia u mawnongrim na ka bynta ban kyntiew kyrdan ia ka Pynursla CHC sha ka Sub- Divisional Hospital ha ka jingiadon lang ka Myntri ka Tnad ka koit ka khiah ka Kong Ampareen Lyngdoh.

Ha kane ka sngi la plie paidbah ruh ia ka First Referral Unit (FRU) ka Pynursla CHC.

Ha ka jingkren kum u Kongsan, u Bah Prestone u la pynpaw ia ka jingangnud jong ka sorkar jylla ban kyntiew ia ki jaka sumar ha kylleng ka jylla Meghalaya. U la ong ruh ba ka jingkyntiew kyrdan ia ka Pynursla CHC sha ka Sub Divisional Hospital kan kyntiew shibun ia ki lad jingsumar na ka bynta ki nongshong shnong bad ki thain ba marjan kumjuh.

U Myntri u la ban jur ia ka jingdonkam jong ka koit ka khiah bad u la ai khublei kyrpang ia ka jingtrei shitom jong ki doktor, ki nurse bad ki nongtrei ka tnad ka koit ka khiah ha ki thain nongkyndong.U pynshlur ruh ia ki nongshong shnong ka Pynursla ba kin pynrung kyrteng ia lade na ka bynta ka Meghalaya Health Insurance Scheme (MHIS) bad ban pyniasoh ia u Aadhaar na ka bynta ki jingioh jingmyntoi ha ka liang ka koit ka khiah lyngba ka sorkar.U la kyntu ruh ia ki paidbah ban weng noh ia ki jingngeit biej bad ban pdiang ia ka jingkylla kaba bha na ka bynta ka roi ka par jong ka thain.

Katba ka Kong Ampareen ha ka jingkren ka la pynpaw ia ka bynta kaba kongsan jong kane ka Sub Divisional Hospital ba la pynbna thymmai na ka bynta ban pynioh ia ki lad jingsumar ba kham biang. Ka la ong ruh ba kane ka First Referral Unit kaba dang plie thymmai kan ai ia ki lad jingsumar  ba kyrpang bapher bapher baroh 24 kynta, bad kane kan pynduna ruh ia ka jingdonkam jong ki nongpang ban leit sha ki jaka ba jngai na ka bynta ban ioh jingsumar.

Kane kan dei ka Sub-Divisional Hospital kaba lai ha ka jylla, kata nalor kaba la don ha Jengal Sub-Division bad ha Jarain PHC.

Kiwei pat kiba la ia don lang ha kane ka prokram ba la pynlong ha phyllaw jong ka Pynursla CHC ki kynthup ia u Principal Secretary ka tnad ka Koit ka Khiah u Sampath Kumar, ka Sub-Divisional Officer Pynursla, Kong EL Warjri, ka DHS (MI) Dr. JS Momin, DHS (MCH&FW) Dr. N Kharsohnoh, Rangbah Shnong Urksew Wahpathaw, Bah Archallson Lyngdoh, ki doktor, ki nos, ki ASHA bad ki paidbah nongshong shnong.