Buh kyndon sa ka shnong Chilliangraij iaki candidate ha Jowai Constituency

Syllad | The Rising MeghalayaJanuary 20, 2023

Ka Dorbar Shnong Chilliangraij kaba hap ha Jowai Constituency kala buh da ka kyndon iaki candidate ki ban iakhun iaka elekshon MLA 2023, kaba ka jingthep vote kan long haka 27 tarik u bnai Rympang haka por ba wan ialap elekshon hapoh ka shnong Chilliangraij.

Ka shnong Chilliangraij kadei ka shnong kaba lai kynthup iaka Panaliar, Loompyrdi Iongpiah ban buh kyndon iaki candidate ban wan ialap elekshon hapoh shnong poh thaw bad kane ka kyndon ka dei na ka bynta ban pynneh iaka jingkhuid jingsuba bad ban lait na ka jingkhapngiah ki kali motor kumjuh ba ka jingialap kan long kaba jai jai khnang ba ki paid nongshong shnong kin ioh ban sngap ban sngew iaka nongrim bad ki mat jong ki kyrtong kiba iakhun iaka elekshon.

U General Secretary ka Dorbar Shnong Chilliangraij, Orilan Shylla ula ong ba ka shnong kala shim ia kane ka rai haka jingialang paidbah jong ka shnong kaba long ha u Naiwieng 30, 2022. Ula ong ia kane kyndon la buh salonsar ia baroh ki candidate khlem ka jingshah liang bad la kyrpad ia baroh ki candidate ban iatreilang bad ka bor shnong ban pynlong ruh iaka elekshon kaba khuid kaba suba bad kaba iaid beit iaid ryntih na ka bynta ka myntoi jong ka imlang ka sahlang.

Pule | Buh kyndon ki ar shnong iaki candidate ha Jowai

Kine harum ki dei ki kyndon ba la buh ka dorbar shnong Chilliangraij:

• Kino kino ki candidate kiba wan ialap elekshon ki dei ban pynkut iaka jingialap elekshon hapoh 10 PM.

• U Candidate u lah ban ialam iaki nongbud tang hapoh 8 ngut kiba nabar ka shnong bad la shah ban wan tang ar kali kynthup ia ka jong u Candidate kiba wan shapoh ka jingialang ban lait na ka jingkhapngiah.

• Ia ka jingialang la shah ban pynlong tang hapoh iingwalieh bad ka jingialang kan long tang na ka bynta ki trai shnong.

• La shah ban kren tang lai ngut ki nongkren kynthup ia u Candidate bad la ailad ban uwei u nongshong shnong uba dei u nongkyrshan jong u candidate bad ym dei ban long u nongkitkam shnong.

• Kino kino ki nongkyrshan kim bit ban pynheh iaki sur jingrwai ha ki kali haka por ialang paidbah hapoh shnong.

• Ka shnong kala khang pyrshah ia kino kino ban iaid ban ieng haka por mynmiet.

• La khang pyrshah ruh ban sam pisa bad lada lap yn pynshitom katkum ki aiñ shnong bad yn aiti sha ki bor jong ka aiñ.

• Ka shnong Chilliangraij kala khang ruh ban pynkylla dur iaka iungwalieh ne pynitynnad da ki jingtah jingwah jong ki party hapoh shnong poh thaw.

• La khang ruh ban ai sha ai dud lait noh tang ia ki phra ngut ban pynneh iaka jingkhuid jingsuba ka jaka pynlong jingialang.

• Kiba leh pyrshah iaki jingpynbeit bad iaki kyndon ka shnong, ka shnong ka la rai ban pyndam shisyndon iaka jingialang ialap elekshon.

• Kino kino ki kam kiba dawa, dei ban ai jingtip sha ka ophis jong ka Dorbar Shnong Chilliangraij.