Buh kyndon ki ar shnong iaki candidate ha Jowai

Syllad | The Rising MeghalayaJanuary 19, 2023

Ban pynlong iaka elekshon kaba jai jai bad kaba suk kaba sain kaba lait na ka jingkhapngiah ha ki shnong ki thaw ka Loompyrdi Iongpiah bad ka Panaliar kiba hap ha Jowai Constituency kila buh da ki kyndon iaki kyrtong kiba wan ban ialap elekshon ha kine ki ar tylli ki shnong.

Ka Loompyrdi Iongpiah, Jowai kala shim iaka rai ba hadien ba kala lap ba ka jingialap elekshon hi kala wanrah iaka jingkhapngiah ka shnong ka thaw bad ktah iaka jingkhuid jingsuba ka shnong namar ka jingwan kiwei pat ki paid nongkyrshan kiba ialam ki kyrtong ha ki jingialap elekshon.

Kumta ka Executive Committee ka Loompyrdi kaba long shong jingialang haka 6.01.2023 kala rai ba kino kino ki kyrtong kiba wan ialap elekshon haka shnong Loompyrdi Iongpiah ban pynsngew iaka nongrim jong ki ha kane ka kynti kin wan ialam tang 10 ngut ki nongkyrshan jong ki hapoh shnong.

Ka Loompyrdi kala shim ia kane ka rai khnang ba ki nongshong shnong kin ioh ka lad ban sngew iaki mat bad ki nongrim jong u kyrtong ba iakhun iaka elekshon.

Katba ka shnong Panaliar pat kala shim iaka sienjam ban khang pyrshah ia kino kino kiba rung ba mih napoh shnong da ki kali ne da ka kjat ban tem pynheh iaki kor pynsawa ne ki sur jingrwai.

Kala khang pyrshah ruh ban iaid hapoh shnong poh thaw haka por mynmiet khamtam ban sam pisa bad lada lap ka bor shnong ban pynshitom bad aiti sha ki bor jong ka aiñ.

Ym shah ruh iaka kyrtong pynkylla dur iaka iungwalieh jong ka shnong ha kino kino ki ialang paidbah bad ym shah ruh ban ai iaka sha ka dud.

La shah iaki kyrtong ban ialam briew tang 10 ngut kynthup ia u candidate hapoh shnong bad la shah ban wanrah tang ar tylli ki kali. Ia kine ki ban rung hapoh shnong ruh yn sa ai da u badge shnong.

Ka Panaliar kala rai ruh ban ailad ban kren tang uwei u nongkren na ka bynta u candidate bad hadien pat yn kren u candidate.

Ki party unit kiba kwah ban lehburom ia u canidate kin hap ban ioh bor na ka shnong bad ym shah ia ki riewshimet

Ym bit iaki nongkyrshan jong kino kino ki kyrtong ban iaid ban ieng na ki kali ne buh kali shapoh shnong kiba hap hapoh u pud u sam ka shnong Panaliar bad lada lap ka shnong kan pynshitom katkum ka rukom bad ki aiñ pyniaid shnong.