Buh jingma ka jingkieng Umsuwai kaba la tor ha East Jaintia Hills, dawa shna ka JNC

Syllad | The Rising MeghalayaDecember 7, 2023

Ka seng Jaiñtia National Council (JNC) 7-shnong Circle, haka 6 tarik Nohprah, hapoh ka jingialam u president u samla Mehi Rymbai ki la leit ban iakynduh ia u Executive Engineer ka Tnat PWD Khliehriat Division bad aiti ruh da ka jingthoh ban dawa ban pynbha bad pynskhem ia ka jingkieng Umsuwai kaba don ha ka lynti surok hapdeng ka Musniang-Rangad ha East Jaintia Hills khnang ba kan ym buh jingma ia ki nongleit nongwan.

Na ka liang u president ka 7 Shnong Circle u la ong ba ka JNC ka sngewkhia jur ba ka jingkieng nar kaba don ha ka thain 7 Shnong jong ki ia kaba la tip ruh kum ka Umsuwai bridge ka dei u budlum ba kongsan ia ki nongleit nongwan jong ka thain kaba pyniasoh ia baroh ki hynniew tylli ki shnong sha ka surok bah. Hynrei, katba nangmih ki sngi ki snem, kane ka jingkieng ka la sdang ban nang tor ba troin noh.

“Ki paidbah ka thain khamtam ki 7 shnong ki hap ban pyndonkam ia kane ka jingkieng ha ka leit ka wan kaba man ka sngi, kata naduh ki khynnah skul jong kiba bun ki shnong ki hap ban kheinduh ia lade man ka sngi ban iaid lyngba kane ka jingkieng nar kaba la tor bad buh jingma,” la ong u kyrwoh ka JNC.

Kumta khnang ban lait na kino kino ki jingjia ba sngewsih ka JNC ka la dawa jur na ka tnat PWD ba kan pynkloi ban maramot bad ban pynskhem pat ia kane ka jingkieng kaba la synjor bad khnang ba kan long ka jingmyntoi ia ka thain 7 shnong hi baroh kawei.

Ha kajuh ka por na ka liang u Executive Engineer u la ong ba un sa rah ia kane ka kam bad ki bor ba halor bad u la pynthikna ruh ba na ka liang ka ophis jong u kan ialeh ban pynkloi katba lah ia kane ka kam.