Buh jaka sa ka Panaliar bad ka Lumbhahdakha haka semifinal 2nd Div, yn sdang sa ka 1st Div ka WJDSA

Syllad | The Rising MeghalayaOctober 3, 2024

Ka Panaliar bad Lumbhahdakha Wahiajer kila lah ha kaban buh jaka ialade haka kyrdan semifinal haka kyrdan 2nd Division Football Tournament-7th Debo Shullai Memorial Trophy kaba pyniaid da ka West Jaintia District Sports Association (WJDSA).

Kane ka la wan hadien ba ka Panaliar kala jop da 2-1 iaka Rising Sun Mukhla bad ka Lumbhahdakha iaka Madankynsaw Mowkyndeng haka jingialehkai quarterfinal kaba la long ha madan Kiang Nangbah Stadium, Jowai haka 3 tarik Risaw.

Haba phai sha ka jingialehkai, ka Panaliar kala tam shakhmat da kine ki ar kol ha kane ka jingiakhun lyngba ka kol u Samhame Sumer (39) bad u Pynskem Shylla (59). Ka Rising Sun Mukhla kala ioh shikol lyngba ka kol u Stopper Bang (69).

Wat la ka Rising Sun kala pyrshang ban iatynjuh bor, hynrei ka Panaliar ruh ka khlem aili ialeh tyngeh ban iada iala ka jong ka kut ialehkai haduh ba kut ka por iakhun ban khur iaka namjop.

Ha lyndet ka namjop ka Lumbhahdakha Wahiajer ka dei ka jinglah ialehkai bha u Gideon Mukhim uba marwei uka khyrwit ar kol (62, 66) bad shuwa kine ki ar kol, shikol la thep da u Rimiki Dhar (58) kaba la biang pura iaka Lumbhahdakha ban khur iaka namjop.

Da kane ka namjop kine ki ar kynhun kin pynkhreh ban mih madan haka semifinal ka ban long haka 7 bad 8 tarik Risaw haka por 2.00 baje nohphai sngi. Ka Panaliar kan aireng pyrshah iaka Nangbah Dakhu bad ka Ka Lion Sports & Youth Affair pyrshah iaka Lumbhahdaka Wahiajer.

Ka WJDSA kala pyntip ruh ba kan noh sa iaka lympung ialehkai 1st Division Football Tournament-12th Chatister Kharkongor Memorial Trophy haka 4 tarik Risaw.

Ha kane ka kyrdan ki don 12 kynhun bad la phiah ha ki ar thup, kata haka Pool A- Chutwakhu, Khimusniang, Dulong, Sohmynting, Nangbah Iawmusiang bad Sabahmuswang. Na ka Pool B- Mooknor Thadmuthlong, Mynthong, Moosalyngkat, Mookyndur, Mukhla Evergreen bad Khliehiongriang.

Haka sngi sdang ka jingiakhun kan long hapdeng ka Chutwakhu pyrshah Khimusniang haka por 2.30 baje nohphai sngi.