Buh jaka ka Ratacherra, Wapungskur bad ka Moopyniein haka quarterfinal 3rd Div ka EJHDFA

Syllad | The Rising MeghalayaOctober 5, 2024

Ka Ratacherra CSC, Wapungskur SSWO bad ka Moopyniein SCSO kila lah ha kaban buh jaka ialade haka kyrdan quarterfinal hadien ba kila khur namjop haka round-16 haka jingialehkai 3rd Division Football Tournament kaba pyniaid da ka East Jaintia Hills District Football Association (EJHDFA) kaba long ha madan artificial turf ha Diengshynrum haka 4 tarik Risaw.

Haba phai sha ki jingialehkai Ratacherra kala jop haduh 7-0 iaka Umtyra YWSC. Ha lyndet kane ka namjop ka dei lyngba ka hattrick u Gradely Mylliem (12, 30, 67) bad mar shikol la iarap thep da u Lutmon Pohshna (19), Heibormi Pohshna (33), Misaial Bareh (75) bad Brightstar Pyngrope (80).

Shuwa kane ka jingialehkai, ka Wapungskur SSWO kala jop da 3-1 iaka Ryntihlang Brishyrnot. Ia ki lai kol ka ka Wapungskur la thep da u Wallam Siangshai (14), Langki Suchiang (55) bad Pynshlurmi Siangshai (74). Shikol ka Ryntihlang la thep da u Wanki Muksor (5)

Haka jingialehkai kaba khatdu ka Moopyniein SCSO kala jop da 1-0 Khliehriat East YWSC. Kane ka shikol ka Moopyniein kala wan haka minit kaba khatduh lyngba u Felix Rymbai (80+3), kane ka kol kala mih paw haka dur jong ka own goal (80+3).

Haka 5 tarik Risaw ka jingiakhun round-16 kan long hapdeng ka Nongthymme SC bad Tuberkmaishnong CSC haka por 12.30 baje mynsngi. Ka Wapungshnong SCSC bad Evergreen SC Ladwahwapung haka por 2.30 baje nohphai sngi.