Buh iaki jaka test ha manla ki khyrdop bad ki jaka sumar ong ka JSU iaka sorkar

Syllad | The Rising MeghalayaMarch 21, 2020

Ka Jaintia Student Union ka la kyntu iaka sorkar Jylla ban pynbiang bad ban buh ki jaka test ha man la ki PHC & CHC haki jaka nongkyndong bad haki jaka khyrdop rung ne mih hapoh ka Jylla.

U Publicity secretary jong ka JSU, Tricky Mukhim ula kyntu ruh iaka sorkar ban buh iaki jaka sah ba kyrpang na ka bynta ki nongshang suwari nabar ri (Foreign Tourist) kiba dang don hapoh ka Jylla namar kine ki nongshang suwari na kiwei ki ri ki shem jingeh ban ioh jaka sah haki Hotel ne Guest House hadien ba la khang noh ia kine ki jaka sah ha ki jaka jngoh kai.

“Ka sorkar ka dei pynbiang iaka jaka sah iaki bad ban buh ki jaka test kiba biang iaki namar kidei kiba wan na kylleng ki ri bad ban buddieng iaka koit ka khiah jong ki,” ong u Tricky bad kyntu ïaki samla pule ka Jylla kiba wanphai iing na ki ri bad ki jylla hapoh ka ri ban pynthikna ba kim dei ban khein sting bad shong ha iing ban nym iakhleh haki jaka bun briew bad ban phah sumar ialade ban khanglad iaka jingpur u khniang coronavirus.

Ka JSU ka kyntu ban peit naka website jong ka sorkar India kaba dei ka website thymmai ba la shna kyrpang ban ai ki khubor shaphang ka jingktah bad ki lad iada ia u khniang Corona Virus ne COVID-19.