Bud ka NPP ia ki dienjat u (L) PA Sangma, sdang ia ka jingialap ilekshon na Adokgre

Syllad | The Rising MeghalayaMarch 16, 2024

Haba bteng ban bud ia ki dienjat ba la sdang da u kpa u (L) Purno Agitok Sangma, ka Seng National Peoples’ Party ha ka 15 tarik Lber, ka la sdang ia ka jingialap ilekshon lyngba ka jingialang paidbah kaba la long ha Adokgre, North Garo Hills.

Ka Adokgre ba la tip ruh kum ka “Chenanggre” lane ka jaka jong ka jingjop ka dei ka jaka kaba u Purno Sangma u ju sdang ia ka jingialap ilekshon. Ha u snem 2016, u Conrad K Sangma u la shimti kum u National President jong ka party bad bteng ia kane ka juh ka lynti, bad kane ka dei kaba la iaid mynta lah palat 30 snem kynthih.

Ha kane ka jingialap ilekshon baroh ki nongialam ka party NPP kiba kynthup ia u State President u Bah Prestone Tynsong, u MP ka Rajya Sabha u Dr W.R. Kharlukhi, State Working President u Marcuise Marak nalor kiwei pat ki nongialam jong ka party ki la ialum lang ha Adokgre ha kane ka jingsdang ialap ia ka ilekshon. Nalor kata baroh ki arngut ki kyrtong kata ka Dr Ampareen Lyngdoh ka ban iakhun na Shillong Lok Sabha bad ka Agatha K Sangma na Tura Lok Sabha seat ki la ia don lang ha kane ka jingialang.

Haba kren ha ka jingialang, u National President ka NPP uba dei ruh u Myntri Rangbah ka Jylla u Conrad K Sangma u la ong, ” La ka dei ka MP, MLA ne MDC ilekshon, I kpa jong ngi u PA Sangma barabor u sdang ia ka jingialap ilekshon na Adokgre namar u don ia ka jingngeit ha ka jingjop, bad kumta ruh la jer Chenanggre. Kane ka ju sdang tang na ka madan kaba rit hynrei mynta ngi la ieng hakhmat jong phi na ka stadium ban pynurlong ia ka jingphohsniew jong une u nongialam jong ngi.”

U la ong ruh ba ka Jylla Meghalaya hi baroh kawei bad khamtam ka Garo Hills ka la sakhi ia ka jingkylla kaba khraw ha kine ki hynriew snem kiba la leit noh. “Kham hashwa, haba ki surok ki long kiba bha kumta ruh ka don ka jingngeit ba kata ka jaka ka dei kaba hap shapoh Assam, katba ki surok kiba sniew ki pynpaw ba ki dei kiba hap hapoh Garo Hills.Mynta kam shym la long shuh kumta,” u la bynrap.

Haba pan jingkyrshan na ka bynta ka Agatha, une u hehduh ka NPP u la ong, “Mynta ka khun jong u PA Sangma ka ieng hakhmat jong phi ban pan ia ka jingkyrshan.Ngam lah ban klet ia u (L) PA Sangma.”

Nalor kata u la ong ruh ba kane ka ilekshon ka long kaba kongsan na ka bynta ka NPP, bad u la pynpaw ia ka jingsngew skhem ba ka jingjop mynta ka kynti kan kynjoh sha ka palat 1.90 lak kaba u la ioh ha ka por ba u la iakhun ha ka ilekshon shiteng samoi hadien ka jingkhlad noh jong u PA Sangma ha u snem 2016.

“Nga sngew skhem ba ngin ioh ia ka jingjop da kaba tam kput ha kane ka ilekshon, kata ka ban ym duna ia ka 2.50 lak lane wat 3 lak,” ong u Conrad da ka jingsngew skhem.