Bthah ka iingkashari ia ka SMB ban shna ia ka jaka pynsah ia ki ksew surok

Syllad | The Rising MeghalayaNovember 28, 2024

Ka iingkashari Meghalaya High Court kala bthah ia ka Shillong Municipal Board (SMB) ba kan shna da ka jaka ban pynsah ia ki ksew surok khnang ban pynjngai na ki jaka paidbah.

Ia kane ka hukum la pynmih ha ka 27 tarik Naiwieng da ka Division Bench jong ka iingkashari Meghalaya High Court ba kynthup ia u Chief Justice IP Mukherjee bad Justice W Diengdoh ha ka jingshim bishar ia ka PIL No .4 of 2024 ba la mudui da u Kaustav Paul pyrshah ia ka sorkarJylla bad kiwei kiwei.

Katkum kane ka hukum, ka iingkashari ka la ong, “Ngi shimkhia ia kane ka kam halor ka jingshisha ba ki ksew surok ki la nangbun bad buh ka jingma kaba khraw ia ki paidbah nongleit nongwan. Ka jingdon jong ki jingjia shah dait ksew bad ka jingiap jong ki briew namar ka jingpang rabies ruh ka la sdang bun.”

Ha kajuh ka por u nongsaid ain jong ka Shillong Municipal Board u la pyntip ba ka Board ka la shim ia ki sienjam ban ai injek ia kine ki ksew surok na ka bynta ban iada na katei ka jingpang bad ruh ban ai injek ia ki khnang ba kin ym kha roi bad hadien ki ju pyllait biang ia ki. U la ong ba haduh mynta hi ym pat don satia ia ki jaka ban pynsah ia ki ksew surok.

Haba pyrto ia ka sienjam ba la shim da ka Municipal Board, ka iingkashari ka la ong, “Ka long kaba donkam ia ka Board ba kan shna ia ka jaka sah khnang ban lah ban buh ia kine ki ksew surok da ka jingiarap jong ka sorkar Jylla bad ban pyntip halor ka sienjam ba la shim ha ka kaiphod ka ban aiti sha kane ka iingkashari hapoh ka 5 tarik Rymphang, 2025”.