Bthah ka High Court ia ka iingkashari ban bteng ia ka jingtohkit ia ki sakhi halor ka jyrsieh thungkam nonghikai

Syllad | The Rising MeghalayaFebruary 20, 2025

Ka Iingkashari Meghalaya High Court ha ka 20 tarik Rymphang ka la bthah ia ka iingkashari kaba shim bishar ba kan pyniaid shakhmat ia ka jingtohkit ia ki sakhi ha kaba iadei bad ka jyrsieh thungkam nonghikai jong u 2009 ia kaba la sei madan da ka Tnad Central Bureau of Investigation (CBI). 

Ia kane ka hukum la pynmih da ka iingkashari ba la khlieh da u Chief Justice IP Mukerji hadien ba la shong bishar ia ka mukotduma kam bymman kaba la kynnoh pyrshah ia ki laingut ki briew kaba kynthup ia ka Myntri kaba don ha ka sorkar MDA ka Kong Ampareen Lyngdoh.

Ka Kong Ampareen kaba dei ka Myntri ka Tnad ka koit ka khiah ba mynta lem bad kiwei ki heh sorkar ki la shah kynnoh donkti halor ki kam leh thok bad pynthud halor ka rukom jied bad thungkam ia ki nonghikai Assistant ha ki Lower Primary School jong ka sorkar Meghalaya ha u snem 2008-09.

Ia ka jingtohkit halor kane ka case (PS Case No.62(07)2011, under Sections 120B, 167, 466, 408, 34 IPC) la aiti sha ka Tnad Central Bureau of Investigation (CBI) da ka iingkashari High Court.

Ha ka hukum jong ka, ka iingkashari ka la ong ba ka jingkyrpad ba la mudui da da ki nongshah kynnoh ki long halor ki nongrim bapher bapher. Ka nongrim ba la pynpaw da nongshah kynnoh ba nyngkong kaba dei ka Myntri sorkar Jylla ka long ba ka chargesheet kam shym la pynpaw satia halor kano kano ka jingpynkhein ain.

“Lyngba ka hukum jong nga kaba ha ka 9 tarik Nohprah 2024, nga la pynpaw ia ka jingkwah jong ka iingkashari ban pyndep kloi ia kane ka mukotduma jingkynnoh kam bymman. Kane ka iingkashari nalor kiwei kiwei pat, ka iohi ba don ka thup kyrteng kaba jrong kata haduh 162 ngut ki sakhi bad ba kan pynkut noh kloi ia ka jingbishar hok lada pynduna noh ia ka. Nalor kiwei pat ki bynta ka lah ban pynsuk ban pynkut noh kloi ia ka jingbishar,” ong u Chief Justice ha ka hukum.

La iehnoh ha ka CBI ba kan shim ia ka rai halor kane ka phang halor ki kam bymman kan bteng ia ka jingtohkit ia ki sakhi tad haduh ba ka CBI ka la shim ia ka rai. La iohi kumba ka paw ba ka rai ka dang sahteng. Haduh mynta kumba 21 ngut na ki sakhi la dep ban tohkit.

U nongiasaid na ka bynta ka nongshah kynnoh u la pyntip ba ka jingdon jong ki sakhi ba la tyrwa ban tohkit da ka CBI mynta ki la palat ia ka 400 ngut, ia kaba u Deputy Solicitor General um shym la lah ban pynthikna mynta ka sngi.

U la bthah ruh, “Ka CBI ka dei ban pyni sha ka iingkashari la kan iaid shakhmat ban tohkit ia baroh ki sakhi lane ban pynduna ia ka jingdon jong ki lane ban pan por shuh shuh ban pynmih ia ka thup jong ki sakhi kaba mynta ne ka thup ba la mait noh. Lada ka CBI ka la shim ia ka rai ba ka iingkashari kan iaid shakhmat bad lada ka wad por shuh ban shim ia ka rai halor kane ka mat, ka jingtohkit shuh shuh ia ki sakhi hadien ba la tohkit ia ki skahi kiba la don lypa yn pynsangeh noh haduh ban da shim ia ka rai da ka CBI.”

Kumba ka long mynta, ka iingkashari ka la rai ban sngap ia ki aplikeshon jong ki nongshah kynnoh katkum ka kyndon 482 CrPC ha ryngkat ka aplikeshon hapoh kajuh ka kyndon ba la buh da ka CBI ha ka 11 tarik u Lber.