Bteng ka Lockdown ha East Khasi Hills haduh 21 tarik Jylliew, yn buh hospital khynnah ka Jowai

Syllad | The Rising MeghalayaJune 11, 2021

U Myntri Rangbah ka Jylla Conrad K Sangma ula pynbna ba wat la hiar ka positive rate ne ka jingbit khlam kala hiar haka Jylla, hynrei namar ba ka don ka jingma ha kiwei ki district ka sorkar kala rai ban bteng iaka Lockdown ha East Khasi Hill haduh 21 tarik une u bnai Jylliew.

U Conrad ula ong ia kane haba kren bad ki nongthoh khubor hadien ka review meeting ha DC ophis Jowai haka jingwan shim jingkhein halor ka jinglong jingman ka khlam COVID-19 ha West Jaintia Hills District.

Ula ong ba ha kiwei pat ki district la pynkup bor ha ki Deputy Commissioner ban rai katkum ka jinglong jingman hapoh District bad ula bynrap bad 20 percent ki dukan bym die mar bam ne kiba hap hapoh ka Non-Essential ruh yn sa plie noh.

“Ha West Jaintia Hills ka jingiabit khlam jong ki briew ha kane ka district ka jur bad ka Positivity rate ka long haduh 33 percent kaba heh ar lai shah ban iaka jylla baroh kawei kaba long 12.09 percent positivity rate bad ka East Jaintia Hills 9 percent, hynrei ngim nym khein sting tad haduh ba ka jingbit khlam kan poi haduh u pud ba long shngain,” la ong u Conrad.

Haba kylli halor ka jingai dawai tika bad ka jingiap, U Conrad ula ong ha West Jaintia Hills ka kdew shai ba kiba bun kiba iap dei kiba ym shym la ai tika COVID-19, lait na ki wei ar ba kiba la ai iaka tika ba nyngkong.

Ula ong ruh ba kiba la ai tika ki long kiba shngain wat la ki iabit iaka khlam bad ki lait na ka jingshitom jur.

Shuh shuh ula ong ba ka sorkar kala rai ban buh iaka hospital shipor (prefab) kaba 50 jingthiah bad lah ban pynkylla sha ka aspatal khynnah kaba don bad ka ICU ban iakhun pyrshah iaka khlam, lada jia ba wan lynsher ka khlam kaba lai ka ban ktah iaki khynnah.

Ha kaba iadei bad ka Oxygen plant ha Jowai MCH la pynkhreh bad hapoh 48 kynta la ioh ban pyntreikam bad iaka Khliehriat kaba 300 LPM yn sa pyntreikam ha kine ki 10 sngi ban sa wan.

U Conrad ula ong shuh shuh ba ha kaba iadei bad ka RTCPR test ka sorkar kan nym lah ban wanrah iaka laboratory ha manla ki district namar ka heh ka jinglut bad kumjuh ka donkam ban thung iaki nongtrei. Khamtam kine ki jait laboratory ki dei ba pyndonkam naka bynta ban leh iaki test bad ki jingpule halor ki virus ba bunjait.

Ula ong pynpaw ruh ka jingsngewhun halor ka jingiaid shakhmat ka tnad ka koit ha East bad West Jaintia Hills halor ka jingai tika bad ula ban jur ban kin shimkhia ban buh ka thong ban ai tika ia kiba briew kiba don jingma ne kiba lah ban shah ktah.