Beh krad ka Kong Ampareen ia ki nongkyrshan Prah ha ka jingialang ha Umsning

Syllad | The Rising MeghalayaApril 8, 2024

Ka kyrtong MP jong ka Seng National People’s Party (NPP) ka Kong Ampareen Lyngdoh hynne ka janmiet sngi Nyngkong ka la pyndonkam da ki kyntien ba khor ban beh krad ia ki nongkyrshan jong ka Voice of the People Party (VPP) ne Prah na ka jingialang paidbah kaba la long ha Umsning, Ri Bhoi District da kaba ong; “Leit noh sha la iing ioh shibit ka mih ka jingklumar ne ka jingmynsaw, ka VPP ka dei ka party kaba khlem nongrim.”

Kane ka jingbyrthen jong ka Kong Ampareen ka la wan long ruh hadien ba ki la don ki nongkyrshan Prah hapdeng ka jingialang jong ka NPP ha Umsning kiba la ia pyrta ia ka sur ha u Prah ha u Prah, tad hadien ba kane ka kyrtong ka NPP ka la ong, Phi ki nongkyrshan Prah khie leit noh sha la iing namar phi la ioh ia ka lad ban ia lum hynne mynsngi, khie leit noh sha iing ioh mih kano kano ka jingklumar ne jingmynsaw”.

“Phi ki nongkyrshan jong ka party ka bym don nongrim, khie leit noh sha la iing bad peh ia u prah u jong phi katba phi mon”, ong ka kong Ampareen katba ka dang kyrpad ia ki nongkyrshan ka VPP ban mih noh na ka jingialang jong ka NPP.

Nalor kata la sakhi ruh ba hadien kane ka  jingialap Ileksion jong ka Kong Ampareen ha Umsning bad hadien ka jingiaid iakynduh briew ha kiba bun tylli ki shnong ha Ri Bhoi District hynne ka sngi, ka la mih syndet syndet ka jingkynhoi na ki nongkyrshan ka party VPP kiba la pyrta ha u Prah ha u Prah, bad ha kane ka khyllipmat ka la don ruh ka jingiajrong kti markylliang hapdeng ki nongkyrshan jong ka party NPP pyrshah bad ki nongkyrshan ka VPP hynrei la lah ban tem noh ia kane ka jingiakynad da ka  jingkloi wan tuklar da ki pulit ka Umsning Police Outpost.