Ban pynkupbor iaki kynthei, ai jinghikai ban iada ialade ban iakhun iaka jingshah ban beiñ ha Jowai

Syllad | The Rising MeghalayaNovember 26, 2024

Ban pynduh pyndam ia ki kam ban beiñ bad ki kam thombor pyrshah ia ki kynthei, la pynlong iaka jingai jinghikai ban iada ia lade (self-defense) na ka bynta ki khynnah kynthei ha iungwalieh ka Dorbar Shnong Dulong, Jowai haka sngi rakhe iaka ‘International Day for the Elimination of Violence Against Women’ haka 25 tarik Naiwieng.

La lamkhmat da ka District Hub Empowerment of Women ka Tnad Social Welfare, West Jaintia Hills District, Jowai ha ryngkat ka jingiatreilang bad ka Tnat Pulit bad ka West Jaintia Hills District Taekwondo Association

Ha kane ka prokram la ia don lang ruh u Bah GH Passah, MCS Assistant Commissioner, Jowai kum u Kongsan, Waheh Chnong Dulong Sienwanmiki Bareh bad kiwei kiwei

Shibynta jong kane ka jingialap yn pynlong ia ka jingai jinghikai ba san sngi na ka bynta ki khynnah kynthei kumno ba kin nang ban iada ia lade na kino kino ki jngshah lehbein ne shah thombor ia kaba yn iarap aijinghikai da u Bah C Langstang uba dei u Secretary ka est Jaintia Hills District Taekwondo Association bad u Joint Secretary ka Meghalaya Taekwondo Association.

Haba kren ha ka jingialang kum u Kongsan u Bah GH Passah u la kren halor ki jingeh ba ki kynthei bad ki khynnah kynthei ki iakynduh, da kaba ban jur ba kine kim dei tang ki mat jong ki kynthei hynrei ki dei ki mat jong ka imlang ka sahlang kiba ktah ia baroh. U la kdew ba ki kam banbein pyrshah ia ki kynthei ka dei k jingeh kaba la saphriang kylleng bad kaba ktah ym tang ia ki lanot hynrei ia ka imlang sahlang hi baroh kawei.

U la ong ba ka sienjam kaba nyngkong eh ban weng ia kane ka jingshah banbein ka long ban ym shu sngap jar. U la ban jur ruh halor ka jingdonkam  ban thaw ia ki lad jingkyrshan bad ka jingshngan na ka bynta kiba ioh lait im ba kin kren bad pynpaw pyrthei. U la khot ruh ban pynthikna ba ki dei ban ioh ia ki lad jingiarap ha ka liang ka koit ka khiah, ka ain bad na ka bynta ka jingioh khiah ka jong ki. U la ban jur ruh halor ka jingkongsan ban ioh ia ka jingkyrshan ba pura ban pynduh pynduh  ia ki kam banbein bad ki kam thombor pyrshah ia ki kynthei.

U Bah FGN Rynga, District Mission Coordinator (DMC) ha ka jingkren lamphang u la pynshai halor ka bynta jong ki skhim Mission Shati kum ka one Stop Centre, ka Women Helpline 181, ka Beti Bachao Beti Padhao, ka Pradhan Mantri Matru Vanddana Yojana bad ka Palna. U la pynpaw ruh ia ki jingialap ba 16 sngi kaba sdang naduh ka 25 tarik u Naiwieng haduh ka 10 tarik u Nohprah 2024 halor ka jingpynduhjait ia ka jingshah lehbein jong ki kynthei. 

U Bah S Shadap Mannar, Officer incharge Jowai Police Station ha ka jingkren u la pynsngewthuh shaphang ka Cyber Crime, ha kaba u la pynpaw ia ki jingeh kiba nangroi jong ki kam runar bad u la ai ruh ia ki jingai jingmut kiba kordor na ka bynta ban pynthikna ia ka jingshngain ha ka online. U la pynpaw ia ka jingdonkam ban long kiba husiar haba iasam ia ki jingtip ba kyrpang, ban pyndonkam ia ki password kiba khlain, ban kiar na ki link kiba suba bad ban tip ia ki jingma kiba thymmai ha ka online.

Ka Kong I Kharpran, Officer incharge Women Police Station Jowai ka la kren halor ka aiñ POCSO bad ka la kren halor ki jait kam bapher bapher ba la khein kum ki kam runar hapoh ka ain ka la batai ia ka jingkongsan jong ka ain POCSO (ka jingiada ia ki khynnah na ki kam runar ba iadei bad ki kam lehbor), da kaba pynksan ia ka bynta ba kongsan jong ka ban iada ia ki khynnah rit na ki jingshah lehbein bad jingshah banbein ha kane ka bynta.