Ban pynkhie im iaka jingrep krai, pynlong ka JHDS da ka Millet Festival ha Samanong

Syllad | The Rising MeghalayaJanuary 25, 2024

U Krai (Millet) u dei u wei na ki jingthung mynbarim (indigenous crop) uba la jan duhjait ha bun ki jaka ha rilum Khasi Jaintia. Bun na ki nongrep kim da kheinkor shuh ia u ne u jingthung ba kongsan bad u ba iarap ia ka koit ka khiah ki briew. Te khnang ban kham pynneh pynsah bad pynkhie im biang ia une u jingthung mynbarim, ka Jaintia Hills Development Society (JHDS) ha ryngkat ka jingiatreilang bad ka Caritas India bad KVK Jaintia Hills, ki la pynlong da ka Millet Festival ba shisngi halor ka phang “Healthy  Millet Healthy People”.

Ha kane ka sngi la iadonlang ruh katto katne ki riew shemphang kiba khynthup ia ka Kong Larika Challam, Senior Scientist KVK, u Director ka JHDS u Phadar Manbha Pakem, U Coordinator ka JHDS u bah Denis Kurkalang bad kiwei kiwei de ki nongshah khot sngewbha.

U Director ka Jaintia Hills Development Society u la ong ba ka Seng ka la pyrshang ban pynkhie im biang ia une u jingthung naduh ka snem 2018 ha ka shnong Samanong West Jaintia Hills District. Shuh shuh u la ong ruh ba ha une u snem ka Seng ka la pyrshang ban pyniar shuh shuh ia ka jingrep krai sha kiwei pat ki shnong hapoh ka District. Kumta ha kane ka festival la shimbynta ruh da ki nongrep na kiwei pat ki shnong.

Haba phai shaphang ka ka jingmyntoi jong u krai, ka Kong Larika Challam, kaba dei ka senior scientist ka KVK ka la kyntu bad pynshlur ia ki nongrep ba ki donkam ban phai biang ia rukom rep ki mynbarim khnang ban pynneh pynsah ia ka jingbha bad jingsboh ka khyndew. Shuh shuh  ka la ong ruh ba u Krai udei u jingthung uba khlainbor bad u bym juh iap klumar ha ki khiang jingpang lane ka jingkylla ka mariang (Climate resilient). Ka la ong ruh ba une u jingthung u iarap shibun ia ka koit ka khiah ki briew khamtam ha kane ka juk ba mynta. Kumta kala kyntu jur ia ki nongrep ba kin phai khmat biang sha ka rukom rep mynbarim khnang ban pynneh pynsah ia une u jingthung ba kongsan.

Ha kane ka sngi la don ruh ki program pynbyrngia bapher bapher bad ka jingiakop shet jingbam na u krai ba la ia shimbynta da ki nongrep na kylleng ki shnong.

Ha kaba kut jong ka prokram la don ruh ka jingsam khusnam sha ki nongjop jong ka Millet contest bad ka jingai sngewbha da ki Symbai Krai ia ki nongrep ka Shnong Lumtrep, Iangkar, Iongsnieh, Thadsning, Iongthma bad Murapushai kum shibynta ban pynheh pynkhraw shuh shuh ia ka jingrep ia une u Jingthung.