Ban ai scholarship iaki khynnah skul, da ka khusnam pisa yn pynkhalai nusip ka WJSU bad Amlari Model UP School

Syllad | The Rising MeghalayaMarch 10, 2024

Ka War Jaintia Student’s Union (WJSU) ryngkat ka jingiatreilang ka Organising Committee Amlari Model UP School kila pyllait paidbah iaka ticket Lucky draw ban pynmih pisa na ka bynta ka “1st War Jaintia Scholarship Examination 2024”.

Ia kane ka ticket Lucky Draw la pyllait paidbah da u Bah Katdoh Rymbui Retired Superintendent of Police haka jingialang kaba la long ha Community Hall Pdengshakap haka 9 tarik Lber.

U Everest Langstang Publicity Secretary WJSU ula iathuh ba iaka War Jaintia Student Union la seng ha u snem 2000 bad sangeh noh ka jingtreikam naduh u snem 2015, hynrei hadien ka jingiohi iaki shibun ki jingeh hapoh ka thain War Jaintia la pynkhie im biang ha u snem 2023 da kaba thung iaki nongialam bad nongkitkam kiba bathymmai.

U ula iathuh ruh ba ka thong ban pynlong iaka 1st War Jaintia Scholarship Examination 2024 ka long ban kyntiew bad aimynsiem iaki khynnah ka thain haka liang ka pule puthi namar ka jingnang jingstad ka long ka waitlam bad ka stieh na ka bynta ka lawei jong ka jaidbynriew kumjuh ka roi ka par.

Ha kaba iadei bad ka scholarship ula ong kadei na ka bynta ki khynnah skul kiba shong Class-V, Class-VII bad IX. Ki khynnah kiba kwah ban ioh ia kane ka scholarship ki hap ban iakhun iaka Eksamin ban pynlong lyngba ki 14 tylli ki Cluster ka thain Amlarem kaba iaka tarik iakhun exam yn pynbna hadien.

Ka song pisa ban sam sha ki khynnah skul ka shong haka jinglah ban pynmih iaka iarong pisa na kaba die iaki Ticket.

Ia kane ka Lucky Draw yn pynkhalai haka 30 tarik Lber haka dor 50 tyngka shi sla. Ka 1st Prize ka long T. 2 lak, 2nd Prize T.1 lak bad 3rd Prize T. 50 hajar bad 15 tylli ki Consolation Prize kaba mar T. 10 hajar marwei.