Ba theh khyndew pathar sha ka Wah Myntdu, jurip ka bor District WJH ryngkat ki synjuk iada mariang

Syllad | The Rising MeghalayaJanuary 17, 2024

Ka ophis u Deputy Commissioner, kumjuh ki tnat treikam sorkar ba kynthup ka Executive Engineer PWD (Rds) Jowai Central Division Jowai, Executive Engineer Water Resource Jowai Division, West Jaintia Hills ryngkat ki dkhot bad nongialam ka seng Khooid Ya Ka Wah Myntdu (KYKWM), ka Jaintia Fishing and Environment Protection Association (JFEPA) haka 17 tarik Kyllalyngkot ki la pynlong ka jingleit jurip iaka Wah Myntdu hadien ka jingkynnoh ba theh khyndew pathar ha Wah Myntdu.

Ha kane ka jingleit jurip la lamkhmat da u Bah S Phanbuh, MCS, Assistant Commissioner, Revenue West Jaintia Hills ryngkat ki sahep sorkar haka jingdonlang u Bah Khroo L Pariat, President KYKWM), DH Pde President JFEPA bad kiwei kiwei.

Ka jingjurip ka sdang na Liar Pam Kam kaba la jan duh jan dam na kadaw ka jingpyndap khyndew na ka jingshna surok, na Jingkieng Myntdu ha Treiongriang bad pynkut pat ha Oor-Khla.

Ka jingjurip iaka Wah Myntdu kadei hadien ka jingud jingnam jong ki paidbah nongshong Shnong bad nongrep halor ka jingbym shngain shuh ka jingioh iaka umbam umdih namar ka jingbym lah shuh ban khlong ia u shyiap ba la dap ha kiba bun ki bynta ka wah Myntdu bad ruh ka jingiohlad ki briew ban bret pathar iaki niut ki jakhlia bad ruh ka jingtheh khyndew ha shilynter ki bynta ka Wah Myntdu khamtam haki bynta ba dang shna iaka surok thymmai kaba don ha Treiongriang.

Kane ka jingtheh khyndew kadei na ka jingshna iaka surok thymmai na Treiongriang ka ban mih sha Khliehtyrshi.

Ki dkhot ka Khooid ya ka Wah Myntdu bad dkhot ka Jaintia Fishing and Environment Protection Association haka jingjurip haki bynta ka Treiongriang ki lap ba ka rukom pyntuid khyndew na ka jingshna iaka surok thymmai ka long kaba khlem da pyrkhat bad ymdei tang ba ka buh jingma hynrei ka lah ruh ban pynduh iaka jinglong jingman jong ka Wah Myntdu bad Mynkrem ha ki sngi ki por ban wan.

La sakhi ba ka  jingheh jong ka surok ka long 25 metre hynrei ka jingpynhap khyndew ka long palat na ka jingkhein bad tur shaduh u pud u ang ka Myntdu. Nalorkata sngewsih ruh ban iohi ba ka Mynkrem kadei ka wah kaba khuid bha hynrei mynta ka la jah bad ruh kiba bun ki tyllong um nakhap lum ki la jah na ka daw ka jinglur khyndew ban shna surok.

U Bah Khroo L Pariat ula pynsngew hakhmat u S. Phanbuh, iaki rai ha kaba iadei ban iada iaka Wah Myntdu khnang ban shngain biang ka jingioh umbam umdih ki nongshong Shnong, ki nongrep kba haki Pynthorneiñ Pynthorwah khamtam ban nanglah ban pynneh pynsah dohum dohwah kumjuh ki sawdon sawkun ka wah Myntdu.

Ki dkhot ka Khooid ya ka Wah Myntdu bad ki dkhot ka Jaintia Fishing and Environment Protection Association ki la ong, ka por ka ladei ban khat bad khlong noh ia u shyiap haki bynta ka wah Myntdu khnang ba ka wah Myntdu kan long kumba ka ju long mynshwa.